საქართველოს მოქალაქის პირადობის დამადასტურებელი მოწმობის, ასევე, დროებითი და მუდმივი ბინადრობის, დროებითი საიდენტიფიკაციო ელექტრონული მოწმობის ვიზუალი შეიცვლება, - აღნიშნულის შესახებ იუსტიციის მინისტრის ანრი ოხანაშვილის სახელით გამოცემულ ბრძანებაშია აღნიშნული.

დოკუმენტის მიხედვით, ცვლილება 2025 წლის 4 ივნისიდან ამოქმედდება. რაც შეეხება ძველ მოწმობებს, კანონმდებლობით განსაზღვრული ვადის ამოწურვამდე იმოქმედებს.

ამასთან, ბრძანების თანახმად, მოწმობაზე დაიტანება საქართველოს სახელმწიფო გერბი სრული სახით, ერთ ფერში და საქართველოს სახელმწიფო დროშა.

„მოწმობის ფონური გამოსახულების ნაბეჭდი ელემენტები ისე უნდა იყოს განაწილებული, რომ რთული იყოს ფონური გამოსახულების დაშლა (მაგალითად, ობიექტის დანაწევრება პატარა კომპონენტებად) გაყალბების მიზნით და მანიპულაციები ადვილად აღმოსაჩენი იყოს.

მოწმობა უნდა შეიცავდეს: სახელს, გვარს, სქესს, მოქალაქეობას, დაბადების თარიღს, დაბადების ადგილს, პირად ნომერს, ფოტოსურათს, პირადი ხელმოწერის ნიმუშს, მოწმობის გამცემი ორგანოს დასახელებას, მოწმობის გაცემის თარიღს, მოწმობის მოქმედების ვადას, ფიზიკური პირის ავთენტიფიკაციის სერტიფიკატს, შესაბამის დახურულ გასაღებს და სერტიფიკატის გამცემი ორგანოს კვალიფიციური ელექტრონული ხელმოწერის სერტიფიკატს, ასევე, შესაბამის დახურულ გასაღებს და სერტიფიკატის გამცემი ორგანოს შესახებ ინფორმაციას, მოწმობის წვდომის კოდს (CAN – Card Access Number) და QR კოდს, რომლის მეშვეობით შესაძლოა გადამოწმდეს დოკუმენტის ან/და პირის შესახებ ინფორმაცია,“ - ნათქვამია იუსტიციის მინისტრის ბრძანებაში.