დავით აღმაშენებლის სახელობის საქართველოს ეროვნული თავდაცვის აკადემიაში ახალი სასწავლო სივრცეები - საქართველოს ტერიტორიული მთლიანობისთვის ბრძოლაში და საერთაშორისო სამშვიდობო მისიებში დაღუპული აკადემიის კურსდამთავრებული ოფიცრების სახელობის კლასები, ასევე, „მართვისა და კონტროლის ინფორმაციული სისტემის“ კლასი შეიქმნა.

როგორც თავდაცვის აკადემიაში აცხადებენ, აღნიშნული სივრცეების გახსნით, ეროვნული თავდაცვის აკადემია პატივს მიაგებს სამშობლოსთვის თავდადებული გმირების ხსოვნას და იუნკერებს და მსმენელებს შეახსენებს ტერიტორიული მთლიანობისთვის ბრძოლაში დაღუპულთა სახელებს. რაც შეეხება „მართვისა და კონტროლის ინფორმაციული სისტემის“ კლასს, ახალი სასწავლო სივრცე ორიენტირებულია თეორიული და პრაქტიკული ცოდნის გაღრმავებაზე და თანამედროვე ტექნოლოგიური ინოვაციების ათვისებაზე.

„ახალი სასწავლო სივრცის ფუნქციონირება ხელს შეუწყობს, რომ იუნკერებმა და მსმენელებმა შეისწავლონ მართვისა და კონტროლის სისტემების საშუალებით ამოცანის დაგეგმვა და აღსრულება, რაც აუმჯობესებს ზუსტი გადაწყვეტილების მიღებას სწრაფად, სწორ დროს და მეტი სიზუსტით.

აკადემიის ახალი სასწავლო სივრცეებით ყოველდღიურ რეჟიმში აქტიურად სარგებლობენ აკადემიის ოფიცრები, სერჟანტები, იუნკერები და მსმენელები“, - აცხადებენ აკადემიაში.