იუსტიციის სამინისტროს საჯარო რეესტრის ეროვნულმა სააგენტომ ინოვაციური სერვისი დანერგა და „გონიერი კონტრაქტის“ სისტემის გამოყენება დაიწყო.

როგორც უწყებაში აცხადებენ, უძრავი ქონების რეგისტრაციის ინოვაციური სერვისს, რომელიც საჯარო რეესტრში დაინერგა, მსოფლიოში ანალოგი არ აქვს.

„გონიერი კონტრაქტი“ მოიაზრებს უძრავი ქონების დისტანციურად, ონლაინ რეჟიმში რეგისტრაციას. ეს არის უსაფრთხოების უმაღლესი სტანდარტებით შექმნილი ნოვატორული სერვისი, რომელიც არ საჭიროებს გარიგების მხარეების ფიზიკურ შეხვედრას.

მომსახურებით სარგებლობა შეუძლიათ საქართველოს მოქალაქეებს, რომლებსაც აქვთ საქართველოს მოქალაქის პირადობის დამადასტურებელი მოწმობა ან/და პასპორტი. აღნიშნული დოკუმენტები აუცილებლად უნდა იყოს მოქმედი (აქტიური).

მხარეები ყიდვა-გაყიდვის ხელშეკრულებას ციფრულ ფორმატში, დისტანციურად, ინტერნეტში ჩართული ელექტრონული მოწყობილობის საშუალებით გააფორმებენ. „გონიერი კონტრაქტის“ მეშვეობით, ასევე, შესაძლებელია იპოთეკის იმავე მეთოდით რეგისტრაციაც.

მოქალაქეებს აღნიშნული სერვისის სარგებლობისთვის სააგენტოს წარმომადგენელთან ვირტუალური შეხვედრის დაჯავშნა საჯარო რეესტრის ეროვნული სააგენტოს ოფიციალურ ვებგვერდზე:www .napr. gov.ge უკვე შეუძლიათ.