გორის მუნიციპალიტეტის განვითარებისა და ტანისა და თეძმის დაცული ლანდშაფტის მართვის სააგენტოს ტურიზმის განყოფილების წარმომადგენლები მუნიციპალიტეტის სკოლებში არსებული მოსწავლეთა ტურისტული კლუბების კურატორ-პედაგოგებს შეხვდნენ.

ღონისძიებაზე კლუბების სამომავლო გეგმებზე, ტურიზმის სფეროში ახალ კონკურსებსა და პროექტებზე ისაუბრეს.

„მონაწილეებს ეკო-განათლების მიმართულებით სააგენტოს გეგმები გავაცანით. მოგეხენებათ, გორის მუნიციპალიტეტში პროექტს - „ველური ბუნების მცველები“ ვახორციელებთ, რომლის მიზანი ველური ბუნების მოვლის და დაცვის შესახებ საზოგადოების ცნობიერების ამაღლებაა. მიმდინარე წელს მოსწავლეთა ტურისტული კლუბები ტანისა და თეძმის დაცული ლანდშაფტის ხეობასა და მუნიციპალიტეტში მცხოვრები ახალგაზრდებისთვის ერთდღიან ეკო-ბანაკს გეგმავენ. წლის განმავლობაში ასეთი ხუთი ბანაკი მოეწყობა და 150 ახალგაზრდა მიიღებს მონაწილეობას“, - „გორის მაცნესთან“ აღნიშნა გორის განვითარებისა და ტანისა და თეძმის დაცული ლანდშაფტის მართვის სააგენტოს დირექტორმა გიორგი ედიშერაშვილმა.

შეხვედრა მოსწავლე-ახალგაზრდობის სპორტული ტურიზმის ცენტრში ჩატარდა.