საზოგადოება
04.03.2025 13:01
გზავნილი არის სიცრუე და შეხება არ აქვს უწყების საქმიანობასთან - შემოსავლების სამსახური გადასახადის გადამხდელებს სიფრთხილისკენ მოუწოდებს
ფინანსთა სამინისტროს შემოსავლების სამსახური გადასახადის გადამხდელებს სიფრთხილისკენ მოუწოდებს.
მათი ცნობით, უწყების სახელით, სხვადასხვა სატელეფონო ნომრებზე ვრცელდება ყალბი გზავნილები, თითქოს მომხმარებელს ერიცხება საგადასახადო ზედმეტობა და თანხის დაბრუნების მიზნით, SMS-ის ავტორები მომხმარებლებს მითითებულ ბმულზე გადასვლას სთავაზობენ.
„შემოსავლების სამსახური კატეგორიულად აცხადებს, რომ გავრცელებული გზავნილი არის სიცრუე და არანაირი შეხება არ აქვს უწყების საქმიანობასთან. თაღლითური სქემის ავტორები მოქალაქეთა თანხების დაუფლებას/გამოყენებას ცდილობენ.
ფინანსთა სამინისტროს შემოსავლების სამსახური მოქალაქეებს მოუწოდებს, გამოიჩინონ სიფრთხილე ამგვარი საეჭვო შეტყობინების მიღების შემთხვევაში და პირადი ინფორმაციის გაზიარება მაქსიმალურად შეზღუდონ.
აქვე გაცნობებთ, რომ მეწარმე სუბიექტს საგადასახადო ორგანოს წერილობითი გადაწყვეტილება/შეტყობინება პროცედურების სრული დაცვით, მხოლოდ „საქართველოს ფოსტის“ მიერ ან მის ავტორიზებულ გვერდზე ელექტრონულად ეგზავნება“, - ნათქვამია უწყების მიერ გავრცელებულ განცხადებაში.
