2024-2025 სასწავლო წლის ეროვნული სასწავლო ოლიმპიადის მესამე, დასკვნითი ტური 9 მარტს დაიწყება და 11 მარტს დასრულდება.

შეფასებისა და გამოცდების ეროვნული ცენტრის ინფორმაციით, დასკვნით ტურში გადასული მოსწავლის მოსაწვევის ამობეჭდვა დღეიდან, 4 მარტიდანაა შესაძლებელი ვებგვერდზე online. naec. ge, რომელსაც მონაწილეებს სკოლის ადმინისტრაცია მიაწვდის.

„დასკვნით ტურში გადასული მოსწავლის მოსაწვევის ამობეჭდვა შეუძლია სკოლის ადმინისტრაციას ცხრანიშნა და ოთხნიშნა კოდების გამოყენებით.

მოსაწვევზე მითითებულია დეტალური ინფორმაცია ტესტირების ადგილის და დროის შესახებ. შეფასებისა და გამოცდების ეროვნული ცენტრი სთხოვს ყველა მონაწილეს, ყურადღებით გაეცნოს მოსაწვევზე მითითებულ ინფორმაციას.

2024-2025 სასწავლო წლის ეროვნული სასწავლო ოლიმპიადის გამარჯვებულია ის მოსწავლე, რომელიც დააგროვებს შესაბამისი საგნის ტესტის მაქსიმალური ქულის 60%-ს და მოხვდება შესაბამისი კლასისა და საგნის რეიტინგული სიის პირველ ათ მონაწილეს შორის.

საუკეთესო შედეგების მქონე მოსწავლეები დიპლომებით, სიგელებითა და სპეციალური პრიზებით დაჯილდოვდებიან. ასევე, გამარჯვებული მოსწავლეები გახდებიან საქართველოს ნაკრები გუნდის წევრები, რომლებიც მონაწილეობას მიიღებენ საერთაშორისო ოლიმპიადებში“, - ნათქვამია ცენტრის მიერ გავრცელებულ ინფორმაციაში.

შეგახსენებთ, ეროვნული სასწავლო ოლიმპიადა ცენტრალიზებულად შემდეგ საგნებში ტარდება: ქართული ენა და ლიტერატურა, ქართული ენა არაქართულენოვანი სკოლების მოსწავლეებისთვის, მათემატიკა, ისტორია, გეოგრაფია, ფიზიკა, ქიმია, ბიოლოგია, უცხოური ენა.

ეროვნული სასწავლო ოლიმპიადა ეროვნულ სასწავლო გეგმას ეფუძნება და მას შეფასებისა და გამოცდების ეროვნული ცენტრი ყოველ წელს სამ ტურად ატარებს.