დავით აღმაშენებლის სახელობის საქართველოს ეროვნული თავდაცვის აკადემიის იუნკერებმა 1921 წელს საბჭოთა ოკუპაციის წინააღმდეგ ბრძოლაში დაღუპულ გმირებს სპექტაკლი - „იუნკერი“ მიუძღვნეს.

ღონისძიებას, რომელიც გორის კულტურის ცენტრში ჩატარდა, საქართველოს თავდაცვის მინისტრის მოადგილეები - გრიგოლ გიორგაძე და გიორგი ლილუაშვილი, თავდაცვის ძალების მეთაურის მოადგილე, გენერალ-მაიორი ზაზა ჩხაიძე, ეროვნული თავდაცვის აკადემიის რექტორი, ბრიგადის გენერალი მამია ბალახაძე, ადგილობრივი თვითმმართველობის წარმომადგენლები და სამხედრო მოსამსახურეები ესწრებოდნენ.

სპექტაკლი საქართველოში 104 წლის წინ განვითარებულ მოვლენებს და რუსეთის წითელი არმიის წინააღმდეგ ბრძოლაში სამხედრო სკოლის იუნკერების მიერ გამოვლენილ გმირობას ასახავდა.

სპექტაკლის დასრულების შემდეგ, ეროვნული თავდაცვის აკადემიის რექტორმა იუნკერებს ქვეყნის ისტორიის პატივისცემისთვის მადლობა გადაუხადა.

ცნობისთვის, ახალგაზრდებმა სპექტაკლი საბჭოთა ოკუპაციის კვირეულის ფარგლებში დადგეს.