საზოგადოება
27.02.2025 12:43
1-ელი მარტიდან, სამგზავრო გადაყვანისთვის ნებართვის აღება სავალდებულოა
1-ელი მარტიდან საერთაშორისო არარეგულარული სამგზავრო და ქვეყნის შიდა რეგულარული სამგზავრო გადაყვანისთვის ნებართვის აღება სავალდებულო ხდება, - ინფორმაციას აღნიშნულის შესახებ სახმელეთო ტრანსპორტის სააგენტო ავრცელებს.
უწყების ინფორმაციით, საავტომობილო ტრანსპორტის სფეროში მიმდინარე რეფორმის ფარგლებში, მიღებულია მგზავრთა გადაყვანის და ავტოსადგურების ფუნქციონირების ახალი რეგულაციები.
„დაინტერესებულმა პირებმა საერთაშორისო არარეგულარული სამგზავრო გადაყვანის მიზნით, შესაბამისი ნებართვის მისაღებად სახმელეთო ტრანსპორტის სააგენტოს, ხოლო ქვეყნის შიდა რეგულარული სამგზავრო გადაყვანის მიზნით შესაბამისი ნებართვისთვის, საქართველოს იუსტიციის სახლებს უნდა მიმართონ.
2025 წლის 1-ელი ივნისიდან სერტიფიცირებას დაექვემდებარება ავტოსადგურებიც.
სერტიფიკატი სახმელეთო ტრანსპორტის სააგენტოს მიერ გაიცემა იმ ავტოსადგურებზე, რომლებიც დააკმაყოფილებენ შესაბამისი კლასისთვის გათვალისწინებულ ინფრასტრუქტურულ და საოპერაციო მოთხოვნებს მუნიციპალიტეტების თანხმობით“, - აცხადებენ სახმელეთო ტრანსპორტის სააგენტოში.
