შიდა ქართლში წუხანდელი ღამიდან გადაუღებლად თოვს. რეგიონის მუნიციპალიტეტებს შორის, ყველაზე უხვი ნალექი ხაშურის მუნიციპალიტეტში ფიქსირდება.

როგორც შიდა ქართლში სახელმწიფო რწმუნებულმა აღნიშნა, შედარებით პრობლემური ზონები სწორედ ხაშურის მუნიციპალიტეტის მაღალი ზონის დასახლებული პუნქტების მიმართულებითაა. ლევან ხარაბაძის ინფორმაციით, რეგიონში მობილიზებულია ყველა შესაბამისი სამსახური და ღამის საათებიდან ამ დრომდე, უწყვეტ რეჟიმში მიმდინარეობს სამუშაოები.

,,უხვი ნალექია რეგიონში, თუმცა, ყველაზე უფრო საყურადღებო ხაშურის მუნიციპალიტეტის სოფლებია, სადაც თოვლის საფარი შედარებით მაღალია. ყველა შესაბამისი სამსახური მობილიზებულია ღამის საათებიდან, სხვა ტექნიკასთან ერთად, 9 ერთეული მძიმე ტექნიკაც მუშაობს, მათ შორის - მუხლუხოებიანი ტრაქტორები და ინტენსიურად იწმინდება გზები. ამ დროისთვის, ხაშურის მუნიციპალიტეტში გვაქვს მაღალი ზონის სოფლები, სადაც მისასვლელი გზები ჩაკეტილია, ყველაფერი კეთდება, რომ დღის ბოლომდე შევძლოთ აღნიშნული გზების გაწმენდასაც, თუმცა, ინტენსიური თოვა გრძელდება, რაც ართულებს მდგომარეობას. ვიყენებთ სრულ ტექნიკურ რესურსს, რომ რეგიონის არცერთი სოფელი არ დაგვრჩეს ყურადღების მიღმა. რაც შეეხება მოსახლეობის ენერგორესურსებით უზრუნველყოფას, ამ მხრივ, შეფერხებები არ გვაქვს“, - აღნიშნა ქართლში სახელმწიფო რწმუნებულმა.