ჯანდაცვის სამინისტროს გადაწყვეტილებით, დიუშენის კუნთოვანი დისტროფიის მქონე ბავშვებს შეზღუდული შესაძლებლობის მქონე პირთა სტატუსი ამ დიაგნოზის­ დასმისთანავე მიენიჭებათ.

უწყების ცნობით, აღნიშნული გადაწყვეტილება ძალაში 1-ელი მარტიდან შევა.

„სახელმწიფო მხარდაჭერის საჭიროების მქონე ბავშვები უზრუნველყოფილი იქნებიან შშმ სტატუსის მქონე პირთათვის განკუთვნილი სერვისებითა და შეღავათებით, რაც დამოუკიდებელი ცხოვრების ხარისხის გაუმჯობესებას განაპირობებს და ხელს შეუწყობს მათ სოციალურ ინტეგრაციას. ეს კი, თავის მხრივ, გაზრდის ბავშვის შესაძლებლობებს, რომ მაქსიმალურად შემცირდეს დაავადების პროგრესის ტემპი.

80 შშმ ბავშვი უზრუნველყოფილი იქნება ფულადი გასაცემელით - სოციალური პაკეტით. ერთი შშმ ბავშვის სოციალური პაკეტით განსაზღვრული ყოველთვიური თანხა 425 ლარს შეადგენს.

დიუშენის კუნთოვანი დისტროფია იშვიათ, გენეტიკურად განპირობებულ, კუნთების პროგრესული დაზიანებით მიმდინარე დაავადებას წარმოადგენს“, - აღნიშნულია ინფორმაციაში, რომელსაც ჯანდაცვის სამინისტრო ავრცელებს.

აღნიშნული გადაწყვეტილება ჯანდაცვის სამინისტრომ დიუშენის სინდრომის მქონე ბავშვების მშობლებთან, ექსპერტებთან და ექიმებთან კომუნიკაციის შედეგად მიიღო.