საქართველოს პრემიერ-მინისტრმა და პარლამენტის თავმჯდომარემ საქართველოს ვაჟ კალათბურთელთა ეროვნული ნაკრების წევრები ღირსების ორდენზე წარადგინეს.

სპორტსმენებს სახელმწიფო ჯილდო საქართველოს ისტორიაში პირველად კალათბურთში მსოფლიო ჩემპიონატის საგზურის მოპოვებისთვის, მსოფლიოს 16 საუკეთესო ნაკრებს შორის მოხვედრის და ევროპის ჩემპიონატზე მეექვსედ ასპარეზობის შესაძლებლობისთვის გადაეცემათ

„საქართველოს ვაჟ კალათბურთელთა ეროვნული ნაკრების შემადგენლობასთან ერთად, ღირსების ორდენზე ნაკრების სამწვრთნელო შტაბი, საქართველოს კალათბურთის ფედერაციის ხელმძღვანელობა, ფედერაციის პრეზიდენტი, გენერალური მდივანი, პირველი ვიცე-პრეზიდენტი და ფედერაციის ვიცე-პრეზიდენტები არიან წარდგენილნი. ამასთან, სპორტის დარგში გამორჩეული მიღწევის და გაწეული ღვაწლისთვის სახელმწიფო ჯილდოზე - ბრწყინვალების ორდენზე წარდგენილნი არიან საქართველოს ვაჟ კალათბურთელთა ეროვნული ნაკრების ყველაზე ტიტულოვანი წევრები: ორგზის ევროლიგის გამარჯვებული და ორგზის ესპანეთის ჩემპიონატის სეზონის საუკეთესო მოთამაშე - გიორგი შერმადინი; 2019-2020 წლების კალათბურთში ესპანეთის ჩემპიონატის გამარჯვებული - თორნიკე შენგელია“, - აღნიშნულია ინფორმაციაში.

პრემიერ-მინისტრმა და პარლამენტის თავმჯდომარემ ღირსეული სამსახურისთვის ღირსების მედლით დაჯილდოების მიზნით, პრეზიდენტს წარუდგინეს საქართველოს ვაჟ კალათბურთელთა ეროვნული ნაკრების პერსონალი. ირაკლი კობახიძის და შალვა პაპუაშვილის ერთობლივი წარდგინება საქართველოს პრეზიდენტს მიხეილ ყაველაშვილს გაეგზავნა.