,,ქართული ოცნების“ და ,,ხალხის ძალის“ დეპუტატებმა პარლამენტში საკანონმდებლო პაკეტი დააინიცირეს, რომლის საფუძველზეც საქართველოში მოქმედი ყველა კანონიდან ტერმინი „გენდერი“ და „გენდერული იდენტობა“ ამოდის, ამასთან, „გენდერული თანასწორობის შესახებ“ კანონს სახელწოდება ეცვლება და მას „ქალისა და მამაკაცის თანასწორობის შესახებ“ კანონი დაერქმევა.

კანონპროექტის თანახმად, კანონებში არსებული ჩანაწერი ,,გენდერული საკითხები“ შეიცვლება ჩანაწერით - ,,ქალისა და მამაკაცის თანასწორობის საკითხები“, ტერმინი ,,გენდერის ნიშნის შეუწყნარებლობა“ იცვლება ,,ქალისა და მამაკაცის თანასწორობისადმი შეუწყნარებლობით“, კანონში გამოყენებული სიტყვები ,,გენდერულად მგრძნობიარე“, შეიცვლება სიტყვებით ,,სქესის ნიშნისადმი მგრძნობიარე“.

პარლამენტში ინიცირებული საკანონმდებლო პაკეტი კომიტეტებს უკვე გადაეცა განსახილველად.