ზოგადსაგანმანათლებლო დაწესებულებებისთვის 2024-2025 სასწავლო წლის საგაზაფხულო არდადეგები ახლოვდება. სასწავლო კალენდრის მიხედვით, არდადეგების ხანგრძლივობა ერთი კვირაა - 8 მარტს, ქალთა დღეს იწყება და 14 მარტის ჩათვლით გრძელდება, თუმცა, მიმდინარე სასწავლო წელს, საჯარო სკოლის მოსწავლეები 10 დღის განმავლობაში დაისვენებენ. ვინაიდან 8 მარტი შაბათია, 15-16 მარტი კი, შაბათ-კვირაა, სკოლები მოსწავლეებს 7 მარტიდან დაითხოვენ და სასწავლო პროცესი 17 მარტიდან განახლდება

რაც შეეხება კერძო სკოლებს, ისინი თავად განსაზღვრავენ უქმე დღეების ვადებსა და არდადეგების ხანგრძლივობას. სასწავლო წლის განმავლობაში არსებული დასვენების დღეები, ასევე, საჯარო სკოლების შემთხვევაში კი, არდადეგები წინასწარ არის განსაზღვრული და ამ თარიღებს კანონი არეგულირებს.

სასწავლო წლის დასრულებამდე, ასევე, დარჩენილია ოფიციალურ უქმე დღეები:

3 მარტი - დედის დღე;

9 აპრილი - საქართველოს სახელმწიფოებრივი დამოუკიდებლობის აღდგენის აქტის მიღების დღე, საქართველოს ეროვნული ერთიანობის, სამოქალაქო თანხმობის და სამშობლოსთვის დაღუპულთა მოგონების დღე;

9 მაისი - ფაშიზმზე გამარჯვების დღე;

12 მაისი - ანდრია პირველწოდებულის ხსენების დღე;

26 მაისი - საქართველოს დამოუკიდებლობის დღე.

ოფიციალურად დასვენებაა სააღდგომო დღეებიც - დიდი პარასკევი, დიდი შაბათი, აღდგომა და მიცვალებულთა მოხსენიების დღე. წელს აღდგომა 20 აპრილსაა შესაბამისად, სკოლებსა და ბაღებში 18 აპრილიდან 21 აპრილის ჩათვლით დაისვენებენ.