დავით აღმაშენებლის სახელობის საქართველოს ეროვნული თავდაცვის აკადემიის სასწავლო ბატალიონის მეორე კურსის იუნკერებმა დავით დავითურმა და გიორგი შათირიშვილმა აშშ-ს ქ. ანაპოლისში, საზღვაო აკადემიაში გამართულ „ლიდერობის კონფერენციაში“ მიიღეს მონაწილეობა.

აკადემიის მიერ გავრცელებული ინფორმაციით, კონფერენცია  სამ ძირითად განსახილველ თემას - „თავმდაბლობის როლი უმცროსი ოფიცრის განვითარებაში“, „რატომ, ფორმაში და ფორმის გარეთ“, „ლიდერობა უფრო დიდი პასუხისმგებლობით, სწავლის უწყვეტობა“ მოიცავდა და აღნიშნულ თემების განსახილველად მიწვეულნი იყვნენ უმაღლესი სამხედრო რანგის პირები და სამოქალაქო სექტორის წარმომადგენლები. კონფერენციაში, აგრეთვე,  მონაწილეობდნენ სხვადასხვა შტატებიდან სამხედრო აკადემიის კადეტები, უცხო ქვეყნების სამხედრო აკადემიის წარმომადგენლები და უნივერსიტეტებიდან მიწვეული სტუდენტები. თემების განხილვის შემდეგ, კადეტები და სტუდენტები შესაბამის სამუშაო ჯგუფებში განიხილავდნენ და მსჯელობდნენ მიღებული ინფორმაციის პრაქტიკაში გამოყენების და დანერგვის მეთოდებზე.

„მსგავსი აქტივობები სტუდენტებს შორის აყალიბებს მეგობრულ გარემოს, რაც ქმნის ხანგრძლივ ურთიერთობებს სტუდენტებს და საგანმანათლებლო დაწესებულებებს შორის. ასევე, ავითარებს სოციალურ და კომუნიკაციურ უნარებს, მონაწილეებს შესაძლებლობას აძლევს მიიღონ რაც შეიძლება მეტი ცოდნა თანამედროვე გამოწვევების შესახებ და შეიძინონ გამოცდილება მსგავს სფეროებში“, - აცხადებენ აკადემიაში.