გორელი სუმოისტი ბადრი ხატისკაცი ნიუ-იორკის სუმოს კლუბში სპორტსმენებისთვის და დაინტერესებული საზოგადოებისთვის მასტერკლასებს ატარებს.

როგორც ხატისკაცმა „გორის მაცნესთან“ აღნიშნა, კლუბი სპორტსმენით სხვადასხვა შეჯიბრზე მიღწეული შედეგებიდან გამომდინარე დაინტერესდა.

აღსანიშნავია, რომ ნიუ-იორკის კლუბის გარდა, სუმოისტი ამერიკის სხვადასხვა კოლეჯის სტუდენტებსაც ხვდება და გამოცდილებას უზიარებს.

„ერთი თვის განმავლობაში სუმოისტებისთვის და აღნიშნული სპორტის სახეობით დაინტერესებული საზოგადოებისთვის მასტერკლასებს ჩავატარებ, რაც ჩემთვის დიდი პასუხისმგებლობა და მოტივაციაა“, - აღნიშნა ბადრი ხატისკაცმა

სპორტსმენი გურამ პაპიტაშვილის სახელობის გორის ჭიდაობის კომპლექსური სპორტული სკოლის აღზრდილია. ხატისკაცი ძიუდოშიც წარმატებით ასპარეზობდა. რაც შეეხება სუმოს, 2016 წლიდან ვარჯიშობს და ამ დრომდე ევროპის ჩემპიონატებზე 30 მედალი აქვს მოპოვებული, მათ შორის - შვიდი ოქრო. მსოფლიოს ჩემპიონატებზე დიდებში სამგზის ბრინჯაოს, 18-წლამდელებში კი ბრინჯაოს პრიზიორია. გარდა ამისა, ხატისკაცი ევროპის ოლიმპიური თამაშების ჩემპიონიცაა. ამჟამად, სპორტსმენი შოთა ჩოჩიშვილის სახელობის გორის კომპლექსურ სპორტულ სკოლაში ვარჯიშობს და მისი პირადი მწვრთნელი მერაბ პაიჭაძეა.