ამერიკის ფსიქოლოგთა ასოციაციის წევრის თემურ სამხარაძის ინიციატივით, გორში არტ-თერაპიის სივრცე გაიხსნა.

როგორც თემურ სამხარაძემ „გორის მაცნესთან“ აღნიშნა, ჯგუფურ არტ-თერაპიაში ჩართვა ნებისმიერ მსურველს შეუძლია და ადამიანებს საშუალებას მისცემს, ემოციები გამოხატონ, გათავისუფლდნენ და უკეთ გაიცნონ საკუთარი თავი. გარდა ამისა, ჯგუფური არტ-თერაპია მონაწილეებს დაეხმარება ემოციური ბალანსის აღდგენასა და სტრესის შემცირებაში, შემოქმედებითი ძალის აღმოჩენა-განვითარებაში.

„რატომ დავიწყე არტ-თერაპია ჩემს მშობლიურ ქალაქში? წლებია, ფსიქოლოგიაში ვმუშაობ, და ყოველთვის მჯეროდა, რომ ხელოვნებას განსაკუთრებული ძალა აქვს.

ხელოვნება გვეხმარება, ჩვენი გრძნობები ფურცელზე გამოვხატოთ, მაშინაც კი, როცა სიტყვებს ვერ ვპოულობთ. აღნიშნული იდეა დიდი ხანია მქონდა გულში, მაგრამ მინდოდა განსაკუთრებით ამ ქალაქში განმეხორციელებინა, სადაც გავიზარდე და ვხედავ, როგორ სჭირდებათ ადამიანებს სითბო, მხარდაჭერა და თვითგამოხატვის სივრცე.

რაც შეეხება მუშაობის სპეციფიკას, ხატვის პროცესი ბევრს ეხმარება სტრესთან გამკლავებაში, თვითშეფასების ამაღლებაში... ხშირად ბავშვები, რომლებიც არ ლაპარაკობენ თავიანთ განცდებზე, ფურცელზე ხატვით გვაჩვენებენ შინაგან სამყაროს. დიდებისთვის კი ეს არის შანსი, ცოტა ხნით თავი დააღწიონ ყოველდღიურ სტრესს და საკუთარ „მეს“ დაუახლოვდნენ. არტ-თერაპია არ ითხოვს მხატვრობის უნარს – ის ითხოვს მხოლოდ სურვილს, იყოთ გახსნილი ცვლილებების და თვითგანვითარებისთვის. ეს არის პროცესის სილამაზე, სადაც ხელოვნება ხდება ჩვენი სულის მკურნალი. გელოდებით, ჩვენი მისამართია გმირების ქუჩა №46 “, - „გორის მაცნესთან“ აღნიშნა ფსიქოლოგმა, ინტეგრირებული ფსიქოტერაპიის პრაქტიკოსმა, არტ თერაპევტმა თემურ სამხარაძემ.