ახალგაზრდობის სააგენტო საგრანტო კონკურსს - „საქართველოს ახალგაზრდობის წარმომადგენელი გაეროში“ აცხადებს.

კონკურსში მონაწილეობა 18-დან 29 წლამდე (კონკურსის დასრულებამდე კანდიდატის ასაკი არ უნდა აღემატებოდეს 29 წელს) ასაკის საქართველოს მოქალაქეს შეუძლია, რომელსაც აქვს სრული ზოგადი განათლება და არ ყოფილა შერჩეული გაეროში საქართველოს ახალგაზრდობის წარმომადგენლად.

რაც შეეხება მოთხოვნებს, მონაწილე კანდიდატი უნდა ფლობდეს ქართულ და ინგლისურ ენებს (წერა და საუბარი); იცნობდეს საკონკურსო თემატიკას, ახალგაზრდულ სფეროში მიმდინარე პროცესებს და ჰქონდეს ინფორმაცია ახალგაზრდობის სააგენტოს, საქართველოში გაეროს წარმოდგენილი სტრუქტურების, ახალგაზრდებთან მომუშავე ორგანიზაციების საქმიანობის შესახებ.

საკონკურსო განაცხადები 2025 წლის 4 მარტის ჩათვლით, ელექტრონულ ფოსტაზე - UNDelegate @ youthagency. gov. ge მიიღება.

გამარჯვებულს შესაძლებლობა ექნება, დაფინანსდეს 30 000 ლარით და მიენიჭოს ერთწლიანი მანდატი; გაემგზავროს ამერიკის შეერთებულ შტატებში და მონაწილეობა მიიღოს გაეროს გენერალური ასამბლეის სოციალურ-ეკონომიკური საბჭოს ახალგაზრდულ ფორუმში; ისაუბროს ქართველი ახალგაზრდების საჭიროებებსა და გამოწვევებზე. ასევე, გაეროში, ახალგაზრდა ელჩების ინსტიტუტის ფარგლებში, მონაწილეობა მიიღოს სხვადასხვა რეზოლუციის და დეკლარაციის შემუშავებაში; ქართველ ახალგაზრდებს გაუზიაროს ცოდნა გაეროს მდგრადი განვითარების მიზნების და გაეროში მიმდინარე მნიშვნელოვანი პროცესების შესახებ.

„საგრანტო კონკურსი პროგრამის - „გაეროში ახალგაზრდა დელეგატები“ ნაწილია, რომელიც აერთიანებს ახალგაზრდებს მთელი მსოფლიოდან და მიზნად ისახავს ახალგაზრდების ინფორმირებას გაეროს მდგრადი განვითარების მიზნების და გაეროში მიმდინარე სხვა საერთაშორისო პროცესების შესახებ. კონკურსის ერთ-ერთი ამოცანაა ოკუპაციის პირობებში მცხოვრები ახალგაზრდების გამოწვევების განსაზღვრა და, ზოგადად, გაეროს დღის წესრიგში საქართველოში მცხოვრები ახალგაზრდების ინტერესების დაცვა“, - აღნიშნულია სააგენტოს მიერ გავრცელებულ ინფორმაციაში.