საჯარო და კერძო სკოლების XI-XII კლასის მოსწავლეებისთვის გამოცხადებულ ესსეების კონკურსში მონაწილეობისთვის რეგისტრაცია დღეს, 20 თებერვალს დასრულდება.

ღონისძიება „ევროპის უნივერსიტეტის“ ორგანიზებით, ქვეყნის მასშტაბით თემაზე - „განათლებისა და წიგნიერების როლი ჩვენი ქვეყნის დემოკრატიული მომავლის ჩამოყალიბების პროცესში“ ტარდება და ორგანიზატორების ინფორმაციით, ესსეების კონკურსის მიზანი მოსწავლეებში განათლების როლის პოპულარიზება და შემოქმედებითი უნარ-ჩვევების განვითარებაა.

„კონკურსის ფარგლებში, მოსწავლეებმა უნდა შექმნან ესსე სპეციალურად შერჩეულ თემაზე. ესსეს თეზისი მონაწილეებისთვის ოლიმპიადის დაწყებამდე 5 წუთით ადრე გახდება ცნობილი.

ოლიმპიადა სკოლებისთვის ორ ლოკაციაზე თბილისსა („ევროპის უნივერსიტეტი“, გურამიშვილის გამზირი N76) და ქუთაისში („ქუთაისის უნივერსიტეტი“, წერეთლის ქ. N13) ერთდროულად ჩატარდება და 23 თებერვალს, 14:00 საათზე დაიწყება.

რაც შეეხება კონკურსს, კონკურსანტებმა ოლიმპიადის დღეს 3 საათში წერილობით უნდა შეასრულონ მინიმუმ 250-სიტყვიანი ესსე ქართულ ენაზე.

„ევროპის უნივერსიტეტის“ მიერ ოლიმპიადისთვის სპეციალურად შერჩეული კომისია 4 მარტამდე სამ საუკეთესო ნაშრომს გამოავლენს.

I, II და III ადგილზე გასულ მოსწავლეებს „ევროპის უნივერსიტეტი“ გრანდიოზული პრიზებით დააჯილდოებს“, - აცხადებენ კონკურსის ორგანიზატორები.

ოლიმპიადაში მონაწილეობის მისაღებად მსურველი უნდა დარეგისტრირდეს ბმულზე: google. com