გორში ძალადობის მსხვერპლთა თავშესაფარი განახლდა.

დევნილთა, შრომის, ჯანმრთელობისა და სოციალური დაცვის მინისტრის მოადგილემ ირინე წაქაძემ  და სახელმწიფო ზრუნვის სააგენტოს დირექტორმა რუსუდან კოხოძემ განახლებული, გარემონტებული და სრულად აღიჭურვილი საცხოვრებელი ოთახები დაათვალიერეს და ბენეფიციარების საჭიროებებს ადგილზე გაეცნენ.

ირინე წაქაძის თქმით, სამინისტროს ერთ-ერთი პრიორიტეტი ძალადობის მსხვერპლთა დაცვა და მხარდაჭერაა. ამ მიზნით, სახელმწიფო აქტიურად მუშაობს ბენეფიციარებზე მორგებული სერვისების განვითარებაზე.

„სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს ბაზაზე 7 კრიზისული ცენტრი და 6 თავშესაფარი ფუნქციონირებს. დამატებით, იგეგმება კიდევ ერთი თავშესაფრის მოწყობა.

სააგენტოს მიერ  ძალადობის მსხვერპლთათვის უზრუნველყოფილია ფსიქოლოგიურ-სოციალური რეაბილიტაცია/დახმარება, იურიდიული, სამართლებრივი დახმარება, სამედიცინო მომსახურების მიღებაში მხარდაჭერა, დროებითი სადღეღამისო საცხოვრისით უზრუნველყოფა  და სხვა.

სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს ცხელი ხაზი - 116 006 - 24 საათის განმავლობაში ფუნქციონირებს“, - აღნიშნულია ინფორმაციაში, რომელსაც დევნილთა, შრომის, ჯანმრთელობისა და სოციალური დაცვის სამინისტრო ავრცელებს.

ცნობისთვის, გორში თავშესაფრის განახლებული სივრცის გახსნა ფონდი HumanDoc-ის და არასამთავრობო ორგანიზაცია „ქართლოსის“ პარტნიორობით და პოლონეთის სახელმწიფოს საგარეო საქმეთა სამინისტროს ფინანსური მხარდაჭერით განხორციელდა. აღნიშნული თანამშრომლობის ფარგლებში, გასულ წლებში დაწესებულებაში გარემონტდა და მოეწყო თავშესაფრის ეზო,  გალავანი, ეზოში განთავსდა ბავშვთა გასართობი სივრცე, ინვენტარით აღიჭურვა  მისაღები ოთახი, სამზარეულო, ფსიქოლოგის და იურისტის ოთახები.