სოციალური დახმარების პროგრამის ფარგლებში, გორის მუნიციპალიტეტის მერია მკვეთრად და მნიშვნელოვნად გამოხატული შეზღუდული შესაძლებლობის მქონე სტუდენტებს, რომლებიც 2025 წელს ჩაირიცხებიან უმაღლეს საგანმანათლებლო დაწესებულებებში, ფინანსურ დახმარებას გაუწევს.

„გორის მაცნეს“ ინფორმაციით, მკვეთრად გამოხატული შშმ სტუდენტებს, რომლებიც მიმდინარე წელს ჩაირიცხებიან უმაღლეს საგანმანათლებლო დაწესებულებებში აკრედიტებულ პროგრამებზე, საბაკალავრო საფეხურზე სწავლის განმავლობაში ერთჯერადად გაეწევათ ფინანსური დახმარება 5000 ლარის ოდენობით.

რაც შეეხება მნიშვნელოვნად გამოხატული შეზღუდული შესაძლებლობის მქონე სტუდენტების დახმარებას, 2025 წელს უმაღლეს საგანმანათლებლო დაწესებულებებში აკრედიტებულ პროგრამებზე ჩარიცხულ ბენეფიციარები, საბაკალავრო საფეხურზე სწავლის განმავლობაში ერთჯერადად 3000 ლარს მიიღებენ.

დახმარებით სარგებლობა შეუძლიათ მხოლოდ გორის მუნიციპალიტეტის ტერიტორიაზე რეგისტრირებულ პირებს.

პროგრამით სარგებლობისთვის მოქალაქეებმა შესაბამისი დოკუმენტაცია უნდა წარადგინონ გორის მერიაში.

საჭირო დოკუმენტების შესახებ ინფორმაცია შეგიძლიათ იხილოთ როგორც საკრებულოს შესაბამის დადგენილებაში, ასევე, ვებგვერდზე: gori. Gov. ge.