ადგილობრივი ხელისუფლების წარმომადგენლები, „სოფლის მხარდაჭერის პროგრამის“ ფარგლებში, მოსახლეობასთან შეხვედრებს აგრძელებენ.

გორის მუნიციპალიტეტის მერის მოვალეობის შემსრულებელი სიმონ გულედანი, ადგილობრივი ხელისუფლების წარმომადგენლებთან ერთად, მუნიციპალიტეტის სოფლებში იმყოფებოდა და მოსახლეობის საჭიროებებს გაეცნო.

ამჯერად, სკრაში, ბეთლემში, ქვემო რიეთში, კოშკებში, პატარა გორიჯვარში, დიდ გორიჯვარში, თედოწმინდაში, არაშენდაში, ვარიანის მეურნეობაში, ტირძნისში, ბროწლეთში, მეღვრეკისში, ერგნეთსა და თერგვისში ადგილობრივებმა 2025 წელს განსახორციელებელი პროექტები ხმათა უმრავლესობით შეარჩიეს.

შეგახსენებთ, „სოფლის მხარდაჭერის პროგრამის“ ფარგლებში, 2025 წელს გორის მუნიციპალიტეტისთვის 1 596 000 ლარია გამოყოფილი და ყველა სოფელში 10 ათასიდან 20 ათას ლარამდე ღირებულების მცირე ინფრასტრუქტურული პროექტები დაფინანსდება.

პროგრამის ფარგლებში განსახორციელებელი პროექტები მუნიციპალიტეტის 112 დასახლებული პუნქტიდან მოსახლეობამ 44-ში უკვე შეარჩია. ადგილობრივებთან შეხვედრები და კონსულტაციები 18 თებერვალს დასრულდება.