თაფლში ვეტერინარული პრეპარატების და სხვა დამაბინძურებელი ნარჩენების კვლევის მიზნით, სურსათის უვნებლობის სახელმწიფო პროგრამის ფარგლებში, სურსათის ეროვნულმა სააგენტომ 2024 წელს, საქართველოს მასშტაბით, 100 ნიმუში აიღო და აკრედიტებულ ლაბორატორიებში გამოიკვლია.

სააგენტოს ინფორმაციით, ლაბორატორიული კვლევის შედეგად, ანტიბიოტიკების ნარჩენები (მეტრონიდაზოლი, ქლორამფენიკოლი, ტეტრაციკლინი) თაფლის 5 ნიმუშში გამოვლინდა და გამოვლენილ დარღვევებთან დაკავშირებით, კანონმდებლობით გათვალისწინებული ზომები გატარდა, ბიზნესოპერატორებს დასახელებული სურსათის რეალიზაცია აეკრძალათ და ბაზრიდან ამოღება დაევალათ, რაზეც ზედამხედველობა სურსათის ეროვნულმა სააგენტომ განახორციელა.

„სააგენტოს მიერ სურსათის და ვეტერინარიის მიმართულებით გააქტიურებული სახელმწიფო კონტროლის, ბიზნესოპერატორებთან თანამშრომლობის და ინფორმირებულობის გაზრდის შედეგად, თაფლში დარღვევები უკანასკნელ წლებში მნიშვნელოვნად შემცირდა. თუკი 2017-2018 წლებში 100 ნიმუშიდან შეუსაბამობა 50 პროცენტში აღინიშნებოდა, 2019 წლიდან მხოლოდ ერთეულ შემთხვევებში ფიქსირდება.

ბოლო წლებში, მომხმარებლის ინტერესების დაცვის, ქართული თაფლის საექსპორტო შესაძლებლობების გაზრდისა და ევროკავშირის კანონმდებლობასთან დაახლოების მიზნით, გარემოს დაცვისა და სოფლის მეურნეობის სამინისტრო, სურსათის ეროვნული სააგენტო თანმიმდევრულ პოლიტიკას ახორციელებენ. 2015 წელს დამტკიცდა თაფლის შესახებ ტექნიკური რეგლამენტი და განისაზღვრა აკრძალული პრეპარატების (ანტიბიოტიკების) ნუსხა; დამტკიცდა ვეტერინარული პრეპარატების, სხვა დამაბინძურებელი ნარჩენი ნივთიერებების მონიტორინგის გეგმა; გაუმჯობესდა ლაბორატორიული შესაძლებლობები და დაინერგა თაფლის სხვადასხვა პარამეტრზე კვლევის შესაბამისი მეთოდოლოგია; 2016 წელს ევროკომისიამ დადებითად შეაფასა სახელმწიფო კონტროლის სისტემა და საქართველოდან ევროკავშირის ტერიტორიაზე თაფლის იმპორტი დაუშვა.

დღეის მდგომარეობით, საქართველოში წარმოებული თაფლი ევროკავშირის და მსოფლიოს არაერთ ქვეყანაში გადის ექსპორტზე“, - აცხადებენ სურსათის ეროვნულ სააგენტოში.