საქართველოს პარლამენტში, დღეს, სამი პოლიტიკური გაერთიანების წევრი დეპუტატებისთვის სადეპუტატო უფლებამოსილების ვადამდე შეწყვეტის საკითხი განიხილეს და „ერთიანობა - ნაციონალური მოძრაობის“, „კოალიცია ცვლილებებისთვის“ და „ძლიერი საქართველოს“ წევრებს, მთლიანობაში - 49 დეპუტატს უფლებამოსილება შეუწყდა.

აღნიშნულმა პოლიტიკურმა გაერთიანებებმა პარლამენტს მანდატების შეწყვეტის მოთხოვნით ნოემბერში მიმართეს.

ცესკოს შემაჯამებელი ოქმის თანახმად, 2024 წლის 26 ოქტომბრის არჩევნების შედეგად ,,ძლიერმა საქართველომ" 14 მანდატი მიიღო, ,,კოალიციამ ცვლილებებისთვის" -19, ხოლო "ერთიანობა - ნაციონალურმა მოძრაობამ" - 16 მანდატი.

რაც შეეხება პარტიას „გახარია საქართველოსთვის“, 12 საპარლამენტო მანდატი აქვს. „გახარია საქართველოსთვის“ 26 ოქტომბრის არჩევნებს არალეგიტიმურად აცხადებს და საპარლამენტო საქმიანობაში არ მონაწილეობს, თუმცა, უფლებამოსილების შეწყვეტის თაობაზე, დანარჩენი 3 პოლიტიკური გაერთიანებისგან განსხვავებით, აღნიშნული პოლიტიკური პარტიის წევრებს განცხადება არ დაუწერიათ.