საქართველოს პარლამენტში დღეს განიხილავენ სამი პოლიტიკური გაერთიანების წევრი დეპუტატებისთვის სადეპუტატო უფლებამოსილების ვადამდე შეწყვეტის საკითხს.

,,ერთიანობა - ნაციონალური მოძრაობის", ,,კოალიცია ცვლილებებისთვის" და ,,ძლიერი საქართველოს" წევრებისთვის, მთლიანობაში - 49 დეპუტატისთვის უფლებამოსილების შეწყვეტის საკითხი პლენარული სხდომის დღის წესრიგში უკვე შევიდა.

აღნიშნულმა პოლიტიკურმა გაერთიანებებმა პარლამენტს მანდატების შეწყვეტის მოთხოვნით ნოემბერში მიმართეს.

ცესკოს შემაჯამებელი ოქმის თანახმად, 2024 წლის 26 ოქტომბრის არჩევნების შედეგად ,,ძლიერმა საქართველომ" 14 მანდატი მიიღო, ,,კოალიციამ ცვლილებებისთვის" -19, ხოლო "ერთიანობა - ნაციონალურმა მოძრაობამ" - 16 მანდატი.

რაც შეეხება პარტიას ,,გახარია საქართველოსთვის", 12 საპარლამენტო მანდატი აქვს. ,,გახარია საქართველოსთვის" 26 ოქტომბრის არჩევნებს არალეგიტიმურად აცხადებს და საპარლამენტო საქმიანობაში არ მონაწილეობს, თუმცა, უფლებამოსილების შეწყვეტის თაობაზე, დანარჩენი 3 პოლიტიკური გაერთიანებისგან განსხვავებით, არნიშნული პოლიტიკური პარტიის წევრებს განცხადება არ დაუწერიათ.