გორის მუნიციპალიტეტის მერია „კულტურული ღონისძიებების პროექტების ხელშეწყობისა და თანადაფინანსების პროგრამას“ წელსაც განახორციელებს.

ადგილობრივი თვითმმართველობის ინფორმაციით, თანადაფინანსების პროგრამებით სარგებლობა მუნიციპალიტეტში რეგისტრირებულ მოსახლეობას და მოქმედ გაერთიანებებს შეუძლიათ. პროგრამებში ჩართვის მსურველებმა კი უნდა მიმართონ გორის მერიას, წარადგინონ პროექტი/ინიციატივა და მოითხოვონ თანადაფინანსება.

რაც შეეხება გასულ წელს, აღნიშნული პროგრამის ფარგლებში დაფინანსდა 17 პროექტი, რომლებშიც 2 000- მდე ბენეფიციარი იყო ჩართული.

„გასულ წელს, გორის მუნიციპალიტეტში მცხოვრებმა ახალგაზრდებმა, მათ შორის, შეზღუდული შესაძლებლობის მქონე პირებმა გაიარეს კერამიკის, სუვენირების დამზადების, ტიხრული მინანქრის, ქორეოგრაფიული სამოსის და ხალხური რეწვის შემსწავლელი კურსები. ჩატარდა სამი ფესტივალი - ,,გაზაფხულის ფესტივალი“, ხელოვნების საერთაშორისო ფესტივალი ,,მაჩაბელი“ და თეატრალური ფესტივალი ,,როტონდა“. ფესტივალების გარდა, გაიმართა კონცერტებიც - ჯაზ-ბენდი ,,კანუდოსისა“ და გორის ქალთა კამერული გუნდის მონაწილეობით, ჩატარდა ლიტერატურული კონკურსი ,,მაჩაბელი“, გამოიცა წიგნები ,,მხატვრის თვალით დანახული გორი“ და „სპორტული კატალოგი“.

ამავე პროგრამის ფარგლებში, გორის ცენტრალურ ქუჩაზე, მრავალსართულიანი სახლის კედელზე შესრულდა მურალი (ერთ მხარეს ფილოსოფოსის მერაბ მამარდაშვილის სახე, მეორე მხარეს ნახატი „ქართული სუფრა“). ახალგაზრდების გააქტიურების და გაძლიერების მიზნით, ასევე, ახალგაზრდებისთვის განხორციელდა პროექტები - ,,სამშობლო განა მარტო ლურჯი მთებია“, ,,აღმოაჩინე არაგვის ხეობა“, „ხელოვნება საზღვრებს გარეშე“, „ART HAUSE-2024“.

„კულტურული ღონისძიებების პროექტების ხელშეწყობისა და თანადაფინანსების პროგრამის" მიზანი გორის მუნიციპალიტეტში კულტურის სფეროს განვითარების ხელშეწყობაა“, - აცხადებენ გორის მუნიციპალიტეტის მერიაში.