გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის მიერ გამოცხადებულ კონკურსში „მწვანე ჯილდო“ მონაწილეობის მისაღებად განაცხადის შევსება მიმდინარეობს და 20 მარტამდეა შესაძლებელი.

ორგანიზატორების ინფორმაციით, „მწვანე ჯილდოს“ კონკურსში მონაწილეობა შეუძლიათ დაწყებითი საფეხურის პედაგოგებს და სკოლამდელი აღზრდის დაწესებულების აღმზრდელებს/მეთოდისტებს, რომლებიც დასაქმებულები არიან საგანმანათლებლო დაწესებულებებში; სასწავლო პროცესში ახორციელებენ გარემოსდაცვითი ან/და აგრარული თემების სწავლებას, როგორც ფორმალური, ისე არაფორმალური განათლების მიმართულებით; ატარებენ აქტივობებს შესაბამისი დამხმარე სახელმძღვანელოებიდან - „გარემოსდაცვითი და აგრარული განათლება სკოლაში“ და „სკოლამდელი გარემოსდაცვითი განათლება“.

კონკურსი 2 ეტაპად: I ეტაპი - განაცხადების შერჩევა; II ეტაპი - განხორციელებული აქტივობების/პროექტების პრეზენტაცია, გაიმართება.

ორივე ეტაპის შედეგების მიხედვით, სპეციალური კომისია გამოავლენს საუკეთესო ათეულს, რომელთაგან გამარჯვებულ მასწავლებელს და აღმზრდელს/მეთოდისტს „მწვანე ჯილდო“ გადაეცემათ.

2024-2025 სასწავლო წლის საუკეთესო აღმზრდელი/მეთოდისტი და დაწყებითი საფეხურის (I-VI კლასი) მასწავლებელი, ტრადიციულად, გარემოს დაცვის მსოფლიო დღეს - 5 ივნისს გამოვლინდება.

დაინტერესებულმა პირებმა დამატებითი ინფორმაციის მისაღებად უნდა დარეკონ ნომერზე: 577 610 972 (ნინო ტაბატაძე).

შეგახსენებთ, კონკურსი „მწვანე ჯილდო“, რომლის მიზანიც სკოლამდელი აღზრდის დაწესებულებებში გარემოსდაცვითი საკითხების სწავლების ხელშეწყობა და აღმზრდელებისა და მეთოდისტების წახალისებაა, 2018 წლიდან საქართველოს მასშტაბით იმართება. უნდა აღინიშნოს, რომ გორის მუნიციპალიტეტის სკოლები აქტიურად და შედეგიანად მონაწილეობენ აღნიშნულ კონკურსში.

გასულ წლებში, „მწვანე ჯილდო“ გორის N12 საჯარო სკოლის ბიოლოგიის და ბუნებისმეტყველების პედაგოგს ასმათ ლეჟავას, გორის N12 საჯარო სკოლის გეოგრაფიის მასწავლებელს მარინე ვართუმაშვილს და ხიდისთავის საჯარო სკოლის სამოქალაქო განათლების და მოქალაქეობის მასწავლებელს მიმოზა ღოლიჯაშვილს გადაეცა.