გორის მუნიციპალიტეტის კეთილმოწყობის სააგენტო კულტურისა და დასვენების პარკ „ახალბაღში“ სხვადასხვა სახის სამუშაოს ახორციელებს.

პარკის ტერიტორიაზე ბუჩქების სხვლა-ფორმირება, მრავალწლიან ნარგავებზე ხმელი ტოტების მოჭრა და გაზონების გასუფთავება მიმდინარეობს. გარდა ამისა, დასასვენებელი სივრცის მთელ ტერიტორიაზე გამაფრთხილებელი აბრებიც განთავსდა.

სააგენტო მოქალაქეებს სოციალური პასუხისმგებლობის გამოჩენისკენ კიდევ ერთხელ მოუწოდებს.

„პარკში გამაფრთხილებელი ნიშნები - „გთხოვთ, ნუ გადახვალთ გაზონზე“ დამონტაჟდა. დასასვენებელი სივრცის მთელ ტერიტორიაზე განთავსებული აბრებით მოქალაქეებს მოვუწოდებთ, არ გადავიდნენ გაზონებზე და არ დააზიანონ მწვანე ნარგავები, რადგან, მსგავსი შემთხვევები გასულ წელს არაერთხელ დაფიქსირდა“, - აცხადებენ სააგენტოში.