საქართველოს პრეზიდენტი მიხეილ ყაველაშვილი გორში, დავით აღმაშენებლის სახელობის ეროვნული თავდაცვის აკადემიას და თავდაცვის ძალების აღმოსავლეთის სარდლობის პირველ ქვეით ბრიგადას ესტუმრა.

სამხედრო ქვედანაყოფსა და ეროვნული თავდაცვის აკადემიაში თავდაცვის ძალების უმაღლეს მთავარსარდალს ვიცე-პრემიერმა, თავდაცვის მინისტრმა ირაკლი ჩიქოვანმა, თავდაცვის ძალების მეთაურმა, გენერალ-მაიორმა გიორგი მათიაშვილმა და უწყების სხვა ხელმძღვანელმა პირებმა უმასპინძლეს.

პრეზიდენტს აკადემიის რექტორმა, ბრიგადის გენერალმა მამია ბალახაძემ სამხედრო სასწავლებლის სტრუქტურა, მიზნები და ამოცანები გააცნო. მიხეილ ყაველაშვილმა იუნკერების საცხოვრებელი ყაზარმები, საკლასო ოთახები, ლაზარეთი, რეკრეაციული და სპორტული სივრცეები, ასევე, სასწავლებლის მუზეუმი დაათვალიერა და სტუმრების წიგნში ჩანაწერიც დატოვა.

პრეზიდენტი, ასევე, პირველ ქვეით ბრიგადას ესტუმრა, სადაც მას აღმოსავლეთის სარდალმა, ბრიგადის გენერალმა როლანდ ძნელაძემ და ბრიგადის მეთაურმა, პოლკოვნიკმა ზაზა შალამბერიძემ ქვედანაყოფის მიზნები გააცნეს. მიხეილ ყაველაშვილმა ბრიგადისა და მე-11 ბატალიონის ინფრასტრუქტურაც დაათვალიერა.

„პრეზიდენტი გაეცნო აკადემიაში არსებულ შესაძლებლობებს, რასაც ვთავაზობთ ჩვენს ახალგაზრდებს, მომავალ ოფიცრებს. ეროვნული თავდაცვის აკადემია არის მოწინავე საგანმანათლებლო დაწესებულება არა მხოლოდ საქართველოში, არამედ რეგიონში. ქვეყნის თავდაცვისუნარიანობის განმტკიცებისა და გაძლიერების საქმეში თავდაცვის აკადემიას მნიშვნელოვანი როლი აქვს. აქ იუნკერებისთვის შექმნილია ყველა პირობა, რომ ჩამოყალიბდნენ ღირსეულ ოფიცრებად.

ჩვენთვის მნიშვნელოვანია პრეზიდენტის სტუმრობა, რადგან ეს არის ძალიან დიდი პატივისცემის გამოხატულება საქართველოს თავდაცვის ძალების მიმართ. მსგავსი ვიზიტები, ქვეყნის მასშტაბით, თავდაცვის ძალების სხვადასხვა ქვედანაყოფში მომავალშიც გაგრძელდება“, - აღნიშნა თავდაცვის მინისტრმა ირაკლი ჩიქოვანმა.