შინაგან საქმეთა სამინისტროს მომსახურების სააგენტოს ყველა სტრუქტურულმა ერთეულმა მუშაობა ჩვეულ რეჟიმში განაახლა.

როგორც უწყებაში აცხადებენ, იმ პირებს, რომლებსაც მართვის უფლების მისაღები პრაქტიკული გამოცდის პირველ ეტაპზე (მოედანი) გასვლა 2025 წლის 1-ელი იანვრიდან 12 იანვრის ჩათვლით უწევდათ, აღნიშნული დღეების გამოყენების შესაძლებლობა დღეიოდან,13 იანვრიდან მიეცემათ.

რაც შეეხება სხვა სერვისებს, მართვის უფლების მისაღები პრაქტიკული გამოცდის მეორე ეტაპზე (ქალაქი) გასვლას კანდიდატები, ასევე, 13 იანვრიდან შეძლებენ.

იმ პირებს კი, რომლებსაც შენახული/დაჯავშნილი აქვთ სატრანსპორტო საშუალების სახელმწიფო სანომრე ნიშნები და აღნიშნულ პერიოდში ეწურებათ შენახვის/დაჯავშნის დრო, ვადა  13 იანვრის ჩათვლით გაუხანგრძლივდებათ.

ის მოქალაქეები კი, რომლებმაც 2024 წლის 30-31 დეკემბერს დააფიქსირეს ცნობის მისაღებად განაცხადი, ასევე, მოითხოვეს ცნობის თარგმნა/დამოწმება (დაჩქარებული მომსახურების მოთხოვნის გარდა), დამზადებულ დოკუმენტს  დღეიდან მიიღებენ.

ისინი კი, ვისაც სატრანსპორტო საშუალების განბაჟების ბოლო დღე უწევთ 2025 წლის 1-ელი იანვრიდან 12 იანვრის ჩათვლით პერიოდში, საჯარიმო სანქციები არ დაეკისრებათ და განბაჟების ბოლო ვადად  13 იანვარი განესაზღვრათ.