გორში სპორტსმენების და მწვრთნელების დაჯილდოების ტრადიციული ცერემონია -„სპორტული გორი 2024“ გაიმართა.

ღონისძიებაზე, რომელსაც ხელისუფლების  წარმომადგენლები ესწრებოდნენ, 2024 წლის მიღწევები შეაჯამეს, წარმატებული სპორტსმენები, მწვრთნელები და გუნდები დააჯილდოვეს.   გამარჯვებულები სამ ნომინაციაში გამოვლინდნენ.

„წლის საუკეთესო სპორტსმენად“ თავისუფალი სტილით მოჭიდავე, 2024 წლის ოლიმპიური ჩემპიონი გენო პეტრიაშვილი დასახელდა.

„წლის საუკეთესო მწვრთნელი“ ტიტულოვანი ფალავნის გენო პეტრიაშვილის პირადი მწვრთნელი, გორის ნუგზარ სხირელის სახელობის ჭიდაობის სკოლის მწვრთნელი არჩილ ბარამიძე გახდა.

„წლის საუკეთესო გუნდის“ სტატუსი კი ევროპის საკლუბო ჩემპიონთა ლიგის ბრინჯაოს პრიზიორმა ძიუდოს კლუბმა „გოლდენ გორი“ მოიპოვა.

„ღონისძიება ყოველ წელს, ტრადიციულად, გორის მუნიციპალიტეტის მერიის ორგანიზებით იმართება.

ფულადი ჯილდოები ერგოთ მსოფლიოსა და ევროპის ჩემპიონატების პრიზიორებს, საქართველოს ჩემპიონებს, სათამაშო სახეობებში ეროვნული და ასაკობრივი ნაკრების წევრებსა და მათ მწვრთნელებს.

პროექტი  „სპორტის განვითარებისა და ხელშეწყობის პროგრამის“ ფარგლებში განხორციელდა“, - აცხადებენ გორის მერიაში.