1-ელი იანვრიდან სადისტრიბუციო ავტომობილებს თბილისში, პიკის საათებში გადაადგილება შეეზღუდებათ.

თბილისის მერიის ინფორმაციით, შეზღუდვა8:00 საათიდან 11:00 საათამდე და 17:00 საათიდან 20:00 საათამდე იმოქმედებს.

„დიდგაბარიტებიანი ავტომობილებისთვის დაწესებული შეზღუდვა აქამდე არ ვრცელდებოდა სადისტრიბუციო ავტომობილებისთვის, ახალი გადაწყვეტილებით კი 1-ლი იანვრიდან რეგულაციებს ისინიც დაექვემდებარებიან.

დღის ან ღამის სხვა ნებისმიერ მონაკვეთში მათ თავისუფლად შეუძლიათ გადაადგილება და დისტრიბუციის განხორციელება“, - განაცხადა თბილისის მერმა კახი კალაძემ.

შეგახსენებთ, 2024 წლის 1-ელი იანვრიდან დროის გარკვეულ მონაკვეთში, დედაქალაქის კონკრეტულ ადგილებში დიდი გაბარიტების მქონე მანქანების, M3, N2 და N3 კატეგორიების სატრანსპორტო საშუალებისთვის გადაადგილება აიკრძალა. აკრძალვა 08:00 - 11:00 საათებსა და 17:00 - 20:00 საათების შუალედში მოქმედებს.

08:00 - 11:00 საათების შუალედში რეგულაცია არ ვრცელდება შემდეგ სატრანსპორტო საშუალებებზე: საზოგადოებრივ ტრანსპორტზე; საავარიო, ასევე სიცოცხლისა და ჯანმრთელობისათვის საფრთხის შემცველი შემთხვევების აღმოსაფხვრელად საჭირო ტრანსპორტზე, (სასწრაფო დახმარების, სამაშველო, სახანძრო, საევაკუაციო და ა.შ. ტრანსპორტი); მუნიციპალური ან სახელმწიფო ინფრასტრუქტურული პროექტების განხორციელებისთვის საჭირო ტრანსპორტზე; მოსწავლეებისა და სტუდენტების გადაადგილებისათვის საჭირო ტრანსპორტზე; ტურისტული საქმიანობის განხორციელებისთვის საჭირო ტრანსპორტზე; ოპერატიულ-სამძებრო საქმიანობის განმახორციელებელ პირებზე; ბეტონმზიდ სატრანსპორტო საშუალებებზე; ნავთობპროდუქტების გადამზიდავ ტრანსპორტზე.

შეზღუდვა არ მოქმედებს შაბათ-კვირას, უქმე დღეებსა და აგვისტოში. კანონის მიხედვით, დამრღვევი პირზე ჯარიმა 1000 ლარია, განმეორების შემთხვევაში კი 3000 ლარი.