საქართველოს სამარიტელთა კავშირი გორის მუნიციპალიტეტში მცხოვრებ 90 ბენეფიციარს საყოფაცხოვრებო საკითხების მოგვარებაში ეხმარება.

ადგილობრივი თვითმმართველობის ცნობით, სოციალური პროექტი გორის მუნიციპალიტეტში მცხოვრები სოციალურად დაუცველი და გადაადგილებაშეზღუდული მოქალაქეებისთვის სადილის მიწოდებას, მცირე სამედიცინო მანიპულაციებს და მათთვის საჭირო კონსულტაციებს ითვალისწინებს.

პროექტს გორის მუნიციპალიტეტის მერია „სოციალური პროექტების თანადაფინანსების პროგრამის“ ფარგლებში აფინანსებს.

„მიმდინარე წელს გორის მუნიციპალიტეტის მერია აღნიშნული პროგრამის ფარგლებში, კიდევ 18 პროექტს აფინანსებს. თანადაფინანსების მიზნით, ადგილობრივი ბიუჯეტიდან 485 400 ლარი გამოიყო. პროექტები სხვადასხვა კატეგორიის ბენეფიციარებისთვის შინმოვლის სერვისით, სამედიცინო-სარეაბილიტაციო კურსებით, დღის ცენტრების მომსახურებით, თავშესაფრითა და საკვებით უზრუნველყოფას ითვალისწინებს“, - აცხადებენ მერიაში.