მომხმარებლის ინტერესების დაცვის მიზნით, საქართველოს კონკურენციისა და მომხმარებლის დაცვის სააგენტომ (GCCA) საქონელსა და მომსახურებაზე ფასის მითითების გზამკვლევი დოკუმენტი მოამზადა.

სააგენტოს ინფორმაციით, დოკუმენტის მომზადების მიზანი ბიზნეს-სამომხმარებლო ურთიერთობებში ფასების გამჭვირვალობა, ბაზრის გამართულად ფუნქციონირება, არაკეთილსინდისიერი კომერციული პრაქტიკის თავიდან არიდება, მომხმარებლის მხრიდან ინფორმირებული გადაწყვეტილების მიღება და მათი ინტერესების დაცვაა.

„მნიშვნელოვანია აღინიშნოს, რომ მომხმარებლის მხრიდან კონკრეტული საქონლის ან მომსახურების შესყიდვის გადაწყვეტილების მიღების დროს, ერთ-ერთი მთავარი ფაქტორი არის - ფასი. შესაბამისად, სამართლიანი და გამჭვირვალე სავაჭრო პრაქტიკის დანერგვის მიზნით, დოკუმენტი მოიცავს შემდგომ ძირითად მითითებებს:

ერთეულის ფასის სტანდარტი: საქონელზე, რომელიც წინასწარ შეფუთული არ არის და მომხმარებლის თვალწინ იწონება/იზომება, უნდა მიეთითოს ერთეულის (1 კილოგრამი, 1 ლიტრი, 1 მეტრი, 1 კვადრატული მეტრი და ა.შ.) ფასი.

ფასდაკლების და სპეციალური შეთავაზების სტანდარტი: მოვაჭრე ვალდებულია, ფასდაკლების გამოცხადებისას, საქონელსა და მომსახურებაზე მიუთითოს სამი სხვადასხვა ფასი: რეფერენსირებული (ფასდაკლებამდე არსებული), ფასდაკლებული და აღნიშნულ საქონელსა თუ მომსახურებაზე ბოლო 30 დღის განმავლობაში მინიჭებული ყველაზე დაბალი ფასი (რეგულაცია არ ვრცელდება ისეთ პროდუქტებზე, რომლებიც მალფუჭებადია ან მოკლე ვარგისიანობის ვადა აქვს. აგრეთვე, მედიკამენტებზე).

რეკლამაში ფასის მითითების სტანდარტი: თუკი მოვაჭრე კონკრეტული საქონელის ან/და მომსახურების შესახებ ინფორმაციას ავრცელებს მისი რეალიზაციის მიზნით, მაშინ სხვა არსებით ინფორმაციასთან ერთად, აუცილებელია ფასის მითითება.

კვების მენიუში ფასის მითითების სტანდარტი: ბარებსა და რესტორნებში - მენიუში მოცემული უნდა იყოს საკვების და სასმელის საბოლოო ფასი, რომელიც მოიცავს დამატებითი ღირებულების გადასახადს და სხვა ხარჯებს (მათ შორის მომსახურების საფასურს). მენიუს ბოლოში მითითება, რომ ფასში არ შედის „დღგ“ და მომსახურების გადასახადი - არის კანონის დარღვევა“, - ნათქვამია GCCA-ს მიერ გავრცელებულ ინფორმაციაში.

ცნობისთვის, სახელმძღვანელო ეფუძნება „მომხმარებლის უფლებების დაცვის შესახებ“ საქართველოს კანონს და ევროკავშირის საუკეთესო პრაქტიკას. დოკუმენტის მომზადებაში კი ჩართულნი იყვნენ ევროკავშირის მიერ დაფინანსებული TWINNING-ის პროექტის ექსპერტები და სხვა დაინტერესებული მხარეები.