გორის მუნიციპალიტეტის განვითარების სააგენტოს წარმომადგენლებმა ტანისა და თეძმის დაცული ლანდშაფტის რეინჯერებთან ერთად, სოფელ ბოშურის მოსახლეობასთან შეხვედრა გამართეს.

წლის განმავლობაში განხორციელებული პროექტების, მიღწევების და გამოწვევების გარდა, სათემო შეხვედრაზე ეკო საგანმანათლებლო პროგრამებსა და თემის ჩართულობის საკითხებზე იმსჯელეს. რაც შეეხება მოსახლეობის მხრიდან გაჟღერებულ საკითხებს, ადგილობრივებმა სოფლის საჭიროებების და ინიციატივების მხარდაჭერის აუცილებლობაზე ისაუბრეს.

„შეხვედრას საერთაშორისო ორგანიზაცია - „ადამიანი გაჭირვებაში“ წარმომადგენელიც ესწრებოდა, რომელმაც მოსახლეობას პროექტის - „ახალი ჰორიზონტები: ტანისა და თეძმის დაცული ლანდშაფტის და ადგილობრივი მოსახლეობის ჰარმონიული განვითარება“, დაწყების შესახებ მიაწოდა ინფორმაცია.

აღნიშნული პროექტი დაფინანსებულია ჩეხეთის განვითარების სააგენტოს მიერ, ხოლო მას გორის მუნიციპალიტეტში ორგანიზაცია - „ადამიანი გაჭირვებაში“ ახორციელებს, რომლის მიზანია, ხელი შეუწყოს დაცული ლანდშაფტის ტერიტორიაზე მცხოვრები მოსახლეობის მდგრად განვითარებას და ადმინისტრაციის ინსტიტუციურ გაძლიერებას“, - აცხადებენ გორის განვითარების სააგენტოში.