მოსახლეობისა და სასოფლო-სამეურნეო აღწერის ვადები გახანგრძლივდა და 31 დეკემბრის ჩათვლით გაგრძელდება.

სტატისტიკის ეროვნული სამსახურის ხელმძღვანელის გოგიტა თოდრაძის განცხადებით, აღწერის ფარგლებში უკვე გამოკითხულია 3 მილიონზე მეტი მოქალაქე, თუმცა, პროცესის დასრულებას კიდევ  რამდენიმე დღე სჭირდება.

„მივიღეთ გადაწყვეტილება მოსახლეობისა და სასოფლო-სამეურნეო აღწერის მიმდინარე თვის ბოლომდე გახანგრძლივებასთან დაკავშირებით.  პარალელურად ავამოქმედეთ თვითრეგისტრაციის კითხვარიც, რომლებიც მოქალაქეებს ელექტრონული კითხვარის შევსების შესაძლებლობას დამოუკიდებლად მისცემს“, - განაცხადა გოგიტა თოდრაძემ.

ცნობისთვის, 2024 წლის მოსახლეობის და სასოფლო-სამეურნეო აღწერა, თავდაპირველად, 14 ნოემბრიდან 19 დეკემბრის ჩათვლით პერიოდში მიმდინარეობდა. 14 ნოემბრიდან 23 ნოემბრის ჩათვლით პერიოდში მონაცემები თვითრეგისტრაციის მეთოდით შეგროვდა, ხოლო 29 ნოემბრიდან 19 დეკემბრის ჩათვლით პერიოდში, მონაცემები  „საქსტატის“ ინტერვიუერების მიერ, კარდაკარის პრინციპით, პლანშეტური კომპიუტერის გამოყენებით შეგროვდა.