ლომჭაბუკის მონუმენტის მიმდებარე ტერიტორიაზე არსებულ ,,ხელოვნების სახლში“ ,,გორელ ფოტოგრაფთა კლუბის“ დამფუძნებლები, ამავე კლუბის პროექტ ,,ხელოვნების სახლის“ წევრები, არასამთავრობო ორგანიზაციების და ოპოზიციური პოლიტიკური პარტიების წარმომადგენლები, ასევე საზოგადოების გარკვეული ნაწილი ,,გორელ ფოტოგრაფთა კლუბის“ მხარდასაჭერად შეიკრიბა.

პროტესტის საფუძველი ის ფაქტი გახდა, რომ გორის მუნიციპალიტეტის მერიამ ,,გორელ ფოტოგრაფთა კლუბს“ უზუფრუქტით გადაცემული იმ შენობა-ნაგებობის  ხელშეკრულების შეწყვეტის თაობაზე შეტყობინება გაუგზავნა, სადაც ,,გორელ ფოტოგრაფთა კლუბის“ ერთ-ერთი პროექტი - „ხელოვნების სახლი“ ფუნქციონირებს.

როგორც „გორელ ფოტოგრაფთა კლუბის“ დამფუძნებელი ოთო გვრიტიშვილი აცხადებს, აღნიშნული შენობის უზუფრუქტით გადაცემის ხელშეკრულება მერიასთან თავდაპირველად 2016 წელს გაფორმდა და შემდგომ,  ყოველ ორ წელიწადში ხდებოდა განახლება, ბოლოს კი, ხელშეკრულება 2024 წლის სექტემბერში გაფორმდა.

გორის მერიის ინფორმაციით, მუნიციპალიტეტი აღნიშნულ სივრცეში გეგმავს ინოვაციების ცენტრის მოწყობას ახალგაზრდებისთვის, რომელიც აღიჭურვება თანამედროვე ტექნოლოგიებით.

მერიის მიერ გავრცელებული განცხადებით, მუნიციპალიტეტს, თავისი ინტერესებიდან გამომდინარე, ნებისმიერ დროს ჰქონდა შეთანხმების შეწყვეტის უფლება.

„ლომჭაბუკთან არსებული მუნიციპალური სივრცე უზუფრუქტით ჰქონდა გადაცემული ა(ა)იპ „გორელ ფოტოგრაფთა კლუბს“. კლუბს ხელშეკრულება შეუწყდა ამ დოკუმენტით გათვალისწინებული პუნქტის შესაბამისად, სადაც ცალსახად წერია, რომ მუნიციპალიტეტს, თავისი ინტერესებიდან გამომდინარე, ნებისმიერ დროს ჰქონდა შეთანხმების შეწყვეტის უფლება. გორის მერიის მხრიდან ხელშეკრულების შეწყვეტის მიზეზი გახდა ის ფაქტი, რომ მუნიციპალიტეტი აღნიშნულ სივრცეში გეგმავს ინოვაციების ცენტრის მოწყობას ახალგაზრდებისთვის, რომელიც აღიჭურვება თანამედროვე ტექნოლოგიებით, 3D პრინტერით, ლაზერული ჭრისა და გრავირების აპარატით, ინტერაქტიური სმარტ დაფით, რაც ხელს შეუწყობს ახალგაზრდების განვითარებას. ცენტრში მოეწყობა საგანმანათლებლო აქტივობები, ჩატარდება ტრენინგ-სემინარები და ეს იქნება სივრცე სტარტაპების, იდეური გაერთიანებებისა და სკოლის მოსწავლეებისთვის.

აღსანიშნავია, რომ ხელშეკრულებაში დარღვეულია ხელშეკრულების ერთ-ერთი პირობაც, რომელიც ხელშეკრულების შეწყვეტის კიდევ ერთი მიზეზი გახდა – ა(ა)იპ-ს ხელშეკრულების მიხედვით უნდა განეხორციელებინა ელექტროენერგიის განმხოლოება (ცალკე აბონენტად აყვანა) და კომუნალური გადასახადების გადახდა, რაც არ არის შესრულებული”,- აღნიშნულია ინფორმაციაში, რომელსაც გორის მუნიციპალიტეტის მერია ავრცელებს.

,,გორელ ფოტოგრაფთა კლუბის“ დამფუძნებელი მერიის ამ განცხადებას ,,არასწორს“ უწოდებს და აცხადებს, რომ მისი და კლუბის მხარდამჭერების მოსაზრებით, უზურფრუქტის ხელშეკრულების შეწყვეტის მიზეზი 16 ნოემბერს გახსნილი ის კოლაბორაციული გამოფენა გახდა, რომელიც მიმდინარე პროტესტებს უკავშირდებოდა და დამოუკიდებელი საქართველოს ისტორიის მანძილზე პროტესტის მონაწილეების მიერ გამოყენებულ ფრაზებს მოიცავდა ინსტალაციის სახით.

,,რაც შეეხება დენის გადასახადს, რაზეც მერია ამახვილებს ყურადღებას, არ არის მითითებული თარიღი, რა პერიოდში უნდა მოხდეს, თუმცა, ჩვენ დარეგისტრირებული გვაქვს განცხადება და ,,ენერგოპროსგან“ მოვიდა უარი, რომ აღნიშნულზე საჭიროა ჯერ მერიის თანხმობა. მუნიციპალიტეტში იმდენი ცარიელი შენობაა, ვერც წარმოიდგენთ, სადაც შეუძლიათ რომ გააკეთონ რაც უნდათ და არა - ორგანიზაციის გამოსახლების ხარჯზე და მთავარი - 16 ნოემბერს გავხსენით ინსტალაცია და 21-ში გაახსენდათ, რომ სხვა პროექტი იგეგმება - ეს არის სიტყვის გამოხატვის თავისუფლების შეზღუდვა და უბრალოდ არასწორია“, - განაცხადა ოთო გვრიტიშვილმა.

,,გორელ ფოტოგრაფთა კლუბის“ ადვოკატის ლექსო მერებაშვილის განცხადებით, სასამართლოს უკვე მიმართეს და მერიის წერილის ბათილად ცნობა მოითხოვეს.

,,აუცილებელია აღინიშნოს, რომ ორი თვით ადრე დადებულ ხელშეკრულებაზე ახლა მოიწერა მერიამ და ახლა გაახსენდა, რომ, თურმე, სხვა საჭიროებისთვის აქვს განსაზღვრული ეს ქონება, რაც, რა თქმა უნდა, პირდაპირი დასტურია იმისა, რომ კონკრეტული ორგანიზაციის დასჯა ხდება იმის გამო, რომ მან კონკრეტულ ინსტალაციას უმასპინძლა, რომელიც მიუღებელია მოქმედი ხელისუფლებისთვის. ჩვენ მივმართეთ უკვე სასამართლოს და ვითხოვთ ამ წერილის ბათილად ცნობას და უზუფრუქტის ხელშეკრულების ძალაში დარჩენას. დიახ, ხელშეკრულებაში არის ჩადებული ის პუნქტი, რომ თუკი მერიას დაჭირდებოდა საკუთარი მიზნებისთვის ეს შენობა, შეეძლო შეეწყვიტა ხელშეკრულება, თუმცა, ეს მიზნები მაინცდამაინც ორი თვის შემდეგ გამოჩნდა. თუ ინოვაციების სააგენტოსთან ჰქონდა მერიას მოლაპარაკება, უკვე უნდა ჰქონოდა განსაზღვრული, რომ მოლაპარაკებები შეიძლება დადებითად დასრულებულიყო და ამ შენობის საჭიროება დამდგარიყო, შესაბამისად, კონტრაქტი აღარ უნდა გაეგრძელებინათ. სამართლებრივი ბრძოლა იქნება შედეგიანი, როგორც მინიმუმ, მერიამ უნდა მიმართოს სასამართლოს გამოსახლებაზე, რაც შეიძლება გაიწელოს იმდენ ხანს, რომ უზუფრუქტის ხელშეკრულებას ვადაც გაუვიდეს“, - აღნიშნა ,,გორელ ფოტოგრაფთა კლუბის“ ადვოკატმა.