გორელ ფოტოგრაფთა კლუბი, დღეს 17:00 საათზე ლომჭაბუკის მონუმენტის მიმდებარე ტერიტორიაზე აქციას აანონსებს. პროტესტის საფუძველი ის ფაქტი გახდა, რომ გორის მუნიციპალიტეტის მერიამ გორელ ფოტოგრაფთა კლუბს უზუფრუქტით გადაცემული შენობა-ნაგებობის უზუფრუქტის ხელშეკრულების შეწყვეტის თაობაზე შეტყობინება გაუგზავნა. აღნიშნული შენობა სწორედ ლომჭაბუკის მონუმენტის ტერიტორიაზე მდებარეობს და მასში გორელ ფოტოგრაფთა კლუბის ერთ-ერთი პროექტი - „ხელოვნების სახლი“ ფუნქციონირებდა.

როგორც „გორის მაცნესთან“ „გორელ ფოტოგრაფთა კლუბის“ დამფუძნებელმა ოთო გვრიტიშვილმა აღნიშნა, აღნიშნული შენობის უზუფრუქტით გადაცემის ხელშეკრულება მერიასთან თავდაპირველად  2016 წელს გაფორმდა, მომდევნო ჯერზე კი 2 წლით იდებოდა და 2018, 2020, 2022, ბოლოს კი 2024 წლის სექტემბერში გაფორმდა. 

გვრიტიშვილის განცხადებით, ხელშეკრულების ბათილად ცნობის მოტივად მუნიციპალიტეტის  მერიიდან დასახელებული იყო ფაქტი, რომ ადგილობრივ თვითმმართველობას აღნიშნული ფართი ესაჭიროებოდა, თუმცა, ამასთან დაკავშირებით „გორელ ფოტოგრაფთა“ კლუბს, მის დამფუძნებელს და „ხელოვნების სახლის“ წარმომადგენლებს აბსოლუტურად სხვა მოსაზრება გააჩნიათ. რის შესახებაც, განცხადება სოციალურ ქსელში გაავრცელეს.

 „ხელოვნების სახლის რეზიდენტებმა 16 ნოემბერს გავხსენით კოლაბორაციული გამოფენა, რომელიც იყო რეფლექსია მიმდინარე პროტესტებზე და აერთიანებდა დამოუკიდებელი საქართველოს ისტორიის მანძილზე პროტესტის მონაწილეების მიერ გამოყენებულ ფრაზებს. ინსტალაციის გახსნიდან ზუსტად 5 დღეში გორის მერიისგან მივიღეთ წერილი, რომელიც გვთხოვდა 2 თვის წინ განახლებული უზუფრუქტის ხელშეკრულების შეწყვეტას“, - ნათქვამია განცხადებაში.

რაც შეეხება გორის მუნიციპალიტეტის მერიის პოზიციას, ადგილობრივი თვითმმართველობა მედიასაშუალებების ნაწილის და ა(ა)იპ გორელ ფოტოგრაფთა კლუბის წარმომადგენლების მიერ გავრცელებულ ინფორმაციას შემდეგი განცხადებით ეხმაურება:

„ლომჭაბუკთან არსებული მუნიციპალური სივრცე უზუფრუქტით ჰქონდა გადაცემული ა(ა)იპ „გორელ ფოტოგრაფთა კლუბს“. კლუბს ხელშეკრულება შეუწყდა ამ დოკუმენტით  გათვალისწინებული პუნქტის შესაბამისად, სადაც ცალსახად წერია, რომ მუნიციპალიტეტს თავისი ინტერესებიდან გამომდინარე, ნებისმიერ დროს ჰქონდა შეთანხმების შეწყვეტის უფლება. გორის მერიის მხრიდან ხელშეკრულების შეწყვეტის მიზეზი გახდა ის ფაქტი, რომ მუნიციპალიტეტი აღნიშნულ სივრცეში გეგმავს ინოვაციების ცენტრის მოწყობას ახალგაზრდებისთვის, რომელიც აღიჭურვება თანამედროვე ტექნოლოგიებით, 3D პრინტერით, ლაზერული ჭრისა და გრავირების აპარატით, ინტერაქტიური სმარტ დაფით, რაც ხელს შეუწყობს ახალგაზრდების განვითარებას. ცენტრში მოეწყობა საგანმანათლებლო აქტივობები, ჩატარდება ტრენინგ-სემინარები და ეს იქნება სივრცე სტარტაპების, იდეური გაერთიანებებისა და სკოლის მოსწავლეებისთვის.
აღსანიშნავია, რომ ხელშეკრულებაში დარღვეულია ხელშეკრულების ერთ-ერთი პირობაც, რომელიც ხელშეკრულების შეწყვეტის კიდევ ერთი მიზეზი გახდა –  ა(ა)იპ-ს ხელშეკრულების მიხედვით უნდა განეხორციელებინა ელექტროენერგიის განმხოლოება (ცალკე აბონენტად აყვანა) და კომუნალური გადასახადების გადახდა, რაც არ არის შესრულებული”,- წერია განცხადებაში.