ქვეყნის მასშტაბით, სეზონური გრიპის საწინააღმდეგო ვაქცინაცია მიმდინარეობს.

დევნილთა, შრომის, ჯანმრთელობისა და სოციალური დაცვის სამინისტროს ინფორმაციით, ამ დრომდე, ქვეყნის მასშტაბით, 130 000 მოქალაქე უკვე აიცრა და აცრა ვაქცინაციის სერვისის მიმწოდებელ სამედიცინო დაწესებულებებში 6 თვის ასაკიდანაა შესაძლებელი.

„იმუნიზაცია ყველა მოქალაქისთვის უფასოა და Abbott Biologicals B.V.-ის წარმოების, 4-კომპონენტიანი ვაქცინით მიმდინარეობს, რომელიც ერთ-ერთია ჯანმრთელობის მსოფლიო ორგანიზაციის მიერ რეკომენდებულ ვაქცინებს შორის.

ვაქცინაცია გრიპის და მისი გართულებების თავიდან აცილების ყველაზე ეფექტური საშუალებაა. განსაკუთრებით მნიშვნელოვანია რისკ-ჯგუფების - ასაკოვანი ადამიანების, ორსულების, მცირეწლოვანი ბავშვებს და ქრონიკული დაავადებების  მქონე პირების ყოველწლიური ვაქცინაცია“, - აცხადებენ უწყებაში.

რაც შეეხება აცრის კაბინეტებს, მსურველებს ვაქცინაციის ჩატარება, გორის მუნიციპალიტეტის მასშტაბით ორ ლოკაციაზე - გიორგი აბრამიშვილის სახელობის საქართველოს თავდაცვის სამინისტროს სამხედრო ჰოსპიტალსა და „გორმედში“ შეუძლიათ.

ცნობისთვის, სეზონური გრიპის საწინააღმდეგო ვაქცინაცია 18 ოქტომბრიდან დაიწყო.