ჩვენი საქმიანობის ერთ-ერთი მთავარი მიმართულება იქნება კოჰაბიტაციის ყველა გამოვლინების და ლიბერალური ფაშიზმის საბოლოოდ დამთავრება ჩვენს ქვეყანაში. ეს პროცესი დაიწყო სწორედ ამ დღეებში. ეს პროცესები იყო საქართველოში ლიბერალური ფაშიზმის დასასრულის დასაწყისი, - ამის შესახებ საქართველოს მთავრობის მეთაურმა განაცხადა.

როგორც პრესკონფერენციაზე ირაკლი კობახიძემ აღნიშნა, ,,საბოლოოდ დადასტურდა, რომ ჩავარდნილი ნაცმაიდანის უკან იდგნენ მხოლოდ და მხოლოდ პოლიტიკური ძალები“.

,,რამდენიმე დღე დასჭირდა ძალადობის აღკვეთას, თუმცა, საბოლოო ჯამში, კულტურულად, ნაბიჯ-ნაბიჯ მივედით კანონის აღსრულებამდე და ძალადობის საბოლოოდ აღკვეთამდე. ამ ოთხი წლის განმავლობაში, ჩვენ თვისებრივად გავამყარეთ სახელმწიფოებრიობა ჩვენს ქვეყანაში. სრულიად საპირისპირო მოვლენა იყო წინა ხელისუფლება, სწორედ სამართლის უზენაესობის არარსებობა და კანონის უზენაესობის არარსებობა იყო მთავარი ხელწერა, რაც წინა ხელისუფლებას ახასიათებდა. იმავეს აკეთებენ დღეს ისინი ოპოზიციის რიგებიდან. ისინი არ ცნობენ ლეგიტიმურ არჩევნებს. არ ცნობენ სახელმწიფოს, ხელისუფლებას, ძალადობენ და საბოლოო ჯამში, მთავარი ისაა, რომ ამ ყველაფრით ისინი მაინც ვერ აღწევენ წარმატებას.

საბოლოოდ დადასტურდა, გუშინდელ დღეს, რომ ჩავარდნილი „ნაცმაიდანის“ უკან იდგნენ მხოლოდ და მხოლოდ პოლიტიკური ძალები. იდგნენ კონკრეტული პოლიტიკური პარტიები, ძალადობის მთავარი წყარო იყო პარტიული ოფისები და როგორც კი შევედით ამ პარტიულ ოფისებში, ამოვიღეთ შესაბამისი ძალადობის იარაღი, მაშინვე დასრულდა ძალადობა. გუშინ ნახეთ, რომ რესურსი აღარ ჰქონდათ პარტიულ დაჯგუფებებს ძალადობისთვის. როგორც კი მოიშალა ძალადობის წყარო, მაშინვე აღარ მოუწია რეაგირება შსს-ს. ძალიან კარგად ჩანდა ყველაფერი, რაზეც ვსაუბრობდით. როცა არ იყო ძალადობა მომიტინგეების მხრიდან, საერთოდ არავითარი რეაგირების გაწევა არ დასჭირდა შინაგან საქმეთა სამინისტროს. მითი იმის თაობაზე, რომ ქუჩებში ძალადობდნენ გულწრფელი ახალგაზრდები, თავიდან ბოლომდე, დაიმსხვრა. ეს იყო თავიდან ბოლომდე პარტიულად მართული და დაორგანიზებული ძალადობრივი დაჯგუფებები, რომლებიც ამ დღეების განმავლობაში რუსთაველის გამზირზე მოქმედებდნენ.

აქვე უნდა ვთქვა, რომ ბოლო მოეღება კოჰაბიტაციის ნებისმიერ გამოვლინებას ჩვენს ქვეყანაში და ეს იქნება ჩვენი დღის წესრიგის ერთ-ერთი მთავარი მიმართულება, მათ შორის, საქართველოს მთავრობის საქმიანობის პირობებში, ასევე ყველაფერს გავაკეთებთ იმისთვის, რომ სრულად დავამთავროთ ლიბერალური ფაშიზმი ჩვენს ქვეყანაში. გარდა იმ ამოცანებისა, რაც აქვს საქართველოს მთავრობას, ეს არის ეკონომიკის განვითარება, ჩვენი მოსახლეობის სოციალური მდგომარეობის გაუმჯობესება, საგარეო პოლიტიკური პოზიციების გაძლიერება და ა.შ, ჩვენი საქმიანობის ერთ-ერთი მთავარი მიმართულება იქნება კოჰაბიტაციის ყველა გამოვლინების და ლიბერალური ფაშიზმის საბოლოოდ დამთავრება ჩვენს ქვეყანაში. ეს პროცესი დაიწყო სწორედ ამ დღეებში. ეს პროცესები იყო საქართველოში ლიბერალური ფაშიზმის დასასრულის დასაწყისი“, - განაცხადა ირაკლი კობახიძემ.

კობახიძის განცხადებით, ოპოზიციური მედიაარხები და ასევე უცხოური მედიაც მუშაობდა ცალმხრივად და გადასცემდა სიცრუეს.

,,შემიძლია, უცხოურ მედიას შევთავაზო ნებისმიერ ფორმატში ჩართვა, მაგრამ ეს უნდა იყოს აუცილებლად პირდაპირი ეთერი. დარწმუნებული ვარ, გამოხმაურება მაინცდამაინც ფართო არ იქნება, გამომდინარე იქიდან, რომ ეს სიცრუე მოდებულია მთელ საერთაშორისო მედიას, რაც სამწუხაროა“, - არნიშნა პრემიერ-მინისტრმა.

ინფორმაციისთვის, შინაგან საქმეთა სამინისტროს ინფორმაციით, სისხლის სამართლის კოდექსით გათვალისწინებული ბრალდებებით ამ დროისთვის 18 პირია დაკავებული, რომელთაგან 9 პირი დაკავებულია სისხლის სამართლის კოდექსის 225-ე და 239-ე პრიმა და 353-ე პრიმა მუხლის პირველი ნაწილით.

8 პირია დაკავებული სისხლის სამართლის კოდექსის 225-ე და 239-ე პრიმა მუხლებით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობასა და ძალადობრივი ქმედებისაკენ საჯაროდ მოწოდებას გულისხმობს.

1 პირი კი დაკავებულია აფეთქების მომზადების ბრალდებით.

აღნიშნულის გარდა, აქციების მიმდინარეობისას ადმინისტრაციულ სამართალდარღვევათა კოდექსით დაკავებულია რამდენიმე ათეული პირი, რომელთაგან ნაწილი ჯარიმის შეფარდების საფუძველზე, ნაწილი - გაფრთხილების საფუძველზე გათავისუფლდა, ნაწილს ადმინისტრაციულ სამართალდარღვევათა კოდექსით პატიმრობა შეეფარდა, ნაწილის მიმართ კი გადაწყვეტილება ჯერ არ არის ცნობილი.

საპროტესტო აქციები პარლამენტის მიმდებარე ტერიტორიაზე 28 ნოემბრიდან მიმდინარეობს.