საქართველოს სასკოლო-სპორტული ოლიმპიადის ფარგლებში, 3X3-ზე კალათბურთში გორის მუნიციპალიტეტის პირველობა გაიმართა.

ვაჟთა შორის შეჯიბრის გამარჯვებული პირველი საჯარო სკოლის გუნდი გახდა, რომელმაც ღირსი მამა გიორგი მთაწმინდელის სახელობის გორის გიმნაზიის გუნდი დაამარცხა.

რაც შეეხება გოგონებს, პირველობისთვის ერთმანეთს მეცხრე და მეექვსე საჯარო სკოლის გუნდები დაუპირისპირდნენ. შეხვედრა მეცხრე საჯარო სკოლის სასარგებლოდ დასრულდა.

3X3-ზე კალათბურთში გორის მუნიციპალიტეტის პირველობა საქართველოს სასკოლო სპორტის ეროვნული ფედერაციის, გორის მუნიციპალიტეტის მერიის სპორტის განყოფილების და სპორტის განვითარებისა და ხელშეწყობის სააგენტოს ორგანიზებით გაიმართა.

„სპორტის აღნიშნულ სახეობაში გორის მუნიციპალიტეტის 25 საჯარო სკოლის გოგონათა და ვაჟთა გუნდები მონაწილეობდნენ. პირველობა ოლიმპიური სისტემით ჩატარდა. მუნიციპალური ეტაპების შემდეგ, რეგიონული და ზონალური შეჯიბრებები გაიმართება“, - აღნიშნულია ორგანიზატორების მიერ გავრცელებულ ინფორმაციაში.