ამ წუთებში გორში საპროტესტო აქცია მიმდინარეობს. აქციაზე შეკრებილები არიან ახალგაზრდები, სხვადასხვა პოლიტიკური და საზოგადოებრივი ორგანიზაციების წარმომადგენლები და მოქალაქეები. აქციის მონაწილეებმა, გორის მუნიციპალიტეტის საკრებულოს შენობის მიმდებარე ტერიტორიიდან მსვლელობით გადაინაცვლეს ,,ქართული ოცნების" გორის ოფისთან, მსვლელობის პარალელურად, შეძახილით - „გამოდით“, მოუწოდებენ გორელებს, რომ აქციას შეუერთდნენ. მომიტინგეებს უჭირავთ შემდეგი შინაარსის პლაკატები: „ნუ სცემთ ჩვენს შვილებს“, „გორი არ იქნება სარატოვი“, „გორი მხოლოდ სპეცრაზმი არ არის“. სტალინის ქუჩის გარდა, საპროტესტო აქცია/მსვლელობა მოეწყო ჭავჭავაძისა და მშვიდობის ქუჩებზე. აქციის მიმდებარე ტერიტორიაზე იმყოფებიან სამართალდამცავები.  პოლიციამ აქციის მონაწილეების უსაფრთხოდ მსვლელობის უზრუნვლსაყოფად, აღნიშნულ  ქუჩებზე ტრანსპორტის მოძრაობა შეაჩერა. ,,მოყვარე ვერასდროს გახდება, ვინც ჩვენს თანამოქალაქეებს ბომბავდა, ამიტომ, მტერს დაერქვას მტერი, მოყვარეს -  მოყვარე, ჩვენ დღეს არ გვყავს ლეგიტიმური ხელისუფლება, ხელისუფლება სპეცრაზმელებს არის ამოფარებული, რომლებმაც არც კი იციან, რას აკეთებენ, არ იციან, რომ არ უნდა შეასრულონ უკანონო დავალება, უბრალოდ, სისტემის მსხვერპლნი არიან, საკუთარ მოქალაქეებზე ძალადობისკენ უბიძგებენ, ეს უბედურება უნდა დამთავრდეს, არალიგიტიმური ხელისუფლება უნდა ჩამოშორდეს მმართველობას და დალაგდება ყველაფერი. ჩვენ ხალხს არაფერი გვაქვს გასაყოფი. არჩევნები უნდა ჩატარდეს სამართლიანად და მერე ყველაფერი მოგვარდება", - განაცხადა აქციის ერთ-ერთმა მონაწილემ გიორგი ტურაშვილმა. შეგახსენებთ, თბილისში, პარლამენტის შენობის მიმდებარე ტერიტორიაზე, სამი დღეა, მასშტაბური საპროტესტო აქციები მიმდინარეობს.