მეცნიერების საერთაშორისო დღესთან დაკავშირებით, გორის სახელმწიფო უნივერსიტეტში გამოფენა გაიმართა.

ორგანიზატორების ინფორმაციით, ღონისძიების ფარგლებში, აკადემიური პერსონალის სამეცნიერო პუბლიკაციების და მონოგრაფიების გამოფენა/ექსპოზიცია მოეწყო, სადაც 2020-2024 წლებში გამოქვეყნებული მასალები იყო წამოდგენილი. გორის უნივერსიტეტში დაცული უნიკალური წიგნადი ფონდიდან რარიტეტული ნაწილი გამოიფინა.

გარდა ამისა, ადგილობრივ, საერთაშორისო და ჰორაიზონ ევროპის სამეცნიერო საგრანტო კონკურსებთან დაკავშირებით, საინფორმაციო პრეზენტაციაც ჩატარდა.

მეცნიერების საერთაშორისო დღე 2001 წელს UNESCO-ს ეგიდით დაწესდა, მას შემდეგ საქართველო ყოველწლიურად უერთდება მსოფლიო ინიციატივას. თარიღის დაწესება მიზნად ისახავს საზოგადოებაში მეცნიერების როლის გაძლიერებას, ყოველდღიურ ცხოვრებაში მისი მნიშვნელობის ხაზგასმას და ინოვაციური სამეცნიერო მიღწევების შესახებ მოქალაქეების ინფორმირებას.