გორის მუნიციპალიტეტის სოფელ ზეღდულეთის საბავშვო ბაღში ღვაწლმოსილი პედაგოგის ლილი ბერიანიძის ბაღიდან გაცილების ღონისძიება გაიმართა.

სკოლამდელი აღზრდის სააგენტოს მენეჯერმა გიორგი შათირიშვილმა ლილი ბერიანიძეს 46- წლიანი პედაგოგიური საქმიანობის და თაობების აღზრდაში გაწეული ღვაწლისთვის მადლობა გადაუხადა და სიმბოლურად საჩუქრები გადასცა.

„ბედნიერი ვარ, რომ ჩემი ცხოვრების საუკეთესო წლები ბაღის კედლებში გავატარე. ეს ყველაზე გულწრფელი ადამიანების - ჩემი აღსაზრდელების სიყვარულმა შემაძლებინა. მრავალწლიანი მუშაობის შემდეგ, ძალიან ემოციურია ბავშვებთან და კოლეგებთან დამშვიდობება.

მინდა, მადლობა გადავუხადო სააგენტოს ხელმძღვანელს და თითოეულ თანამშრომელს ასეთი ყურადღებისთვის და პიროვნული დაფასებისთვის“, - აღნიშნა ლილი ბერიანიძემ.

ღონისძიების დასასრულს აღსაზრდელებმა საშემოდგომო თემატიკასთან დაკავშირებული აქტივობებიც შეასრულეს. ზეიმს სააგენტოს თანამშრომლები, საბავშვო ბაღის პერსონალი და აღსაზრდელების მშობლები ესწრებოდნენ.