გორში, დავით აღმაშენებლის სახელობის საქართველოს ეროვნული თავდაცვის აკადემიაში მასწავლებლის ეროვნული დღისადმი მიძღვნილი ღონისძიება გაიმართა.

ღონისძიებაზე აკადემიის რექტორმა, ბრიგადის გენერალმა მამია ბალახაძემ აკადემიის ბაკალავრიატის და მაგისტრატურის პროფესორ-მასწავლებლებს უმასპინძლა. რექტორმა მათ პროფესიული დღე მიულოცა, აღნიშნა მათი ღვაწლი აკადემიის, თავდაცვის ძალების და ქვეყნის წინაშე, თუ რაოდენ მნიშვნელოვანია მათი შრომა და პასუხისმგებლობა მომავალი თაობების აღზრდის საქმეში და უსურვა მათ წარმატებები როგორც პირად, ასევე, სამსახურებრივ საქმიანობაში.

„ღონისძიების დასასრულს რექტორმა სასწავლო პროცესში შეტანილი განსაკუთრებული წვლილისთვის, დაკისრებული მოვალეობის კეთილსინდისიერად და მაღალხარისხოვნად შესრულებისთვის გამორჩეული პროფესორ-მასწავლებლები სტატუეტით „დავით აღმაშენებელი“, საპატიო სიგელით და რექტორის პირადი საჩუქრით დააჯილდოვა“, - ნათქვამია თავდაცვის აკადემიის მიერ გავრცელებულ ინფორმაციაში.

შეგახსენებთ, მასწავლებლის ეროვნული დღე ყოველი წლის 27 ოქტომბერს - ქართველი პედაგოგის, საქართველოში მეცნიერული პედაგოგიკის ფუძემდებლის, პუბლიცისტის, „დედაენის“ ავტორის, საბავშო მწერლის და საზოგადო მოღვაწის იაკობ გოგებაშვილის დაბადების დღეს აღინიშნება.