გორის მუნიციპალიტეტის განვითარების სააგენტო მუნიციპალიტეტში მცხოვრები დასაქმების და განათლების მიღმა მყოფი ქალებისთვის პროექტს- „ქართული რეწვა დასაქმებისთვის“ აგრძელებს.

პროგრამის ფარგლებში, გორის მუნიციპალიტეტის ტერიტორიაზე მცხოვრები გოგონები და ქალები (17 წლიდან), განვითარების სააგენტოს ტურიზმის განყოფილების ხალხური რეწვის სასწავლო მინი გალერეაში თექის, კერამიკის და ფარდაგების ქსოვის უფასო სამთვიან კურსს გაივლიან.

„აღნიშნული ინიციატივის განხორციელების მიზანია, გორის მუნიციპალიტეტში მცხოვრები დასაქმების და განათლების მიღმა მყოფი პირებისთვის, ახალი საქმიანობის შესწავლით, დასაქმების შესაძლებლობების გადაცემა.

კურსის გავლის შემდეგ, საწყის ეტაპზე, მონაწილეებს საშუალება ექნებათ თექის, კერამიკის და ფარდაგების პროტოტიპები და ნიმუშები ტურიზმის განყოფილების მინი გალერეაში უსასყიდლოდ დაამზადონ, ჩაერთონ განვითარების სააგენტოს მიერ ორგანიზებულ ღია ბაზრობებში. სააგენტო კურსდამთავრებულებს, ასევე, დაეხმარება მონაწილეობა მიიღონ მეწარმეობის განვითარების სახელმწიფო პროგრამებში“, - აცხადებენ გორის განვითარების სააგენტოში.

კურსის მონაწილეები შევსებული აპლიკაციების და გასაუბრების საფუძველზე შეირჩევიან. განაცხადები 7 სექტემბრის ჩათვლით მიიღება.

პროექტის შესახებ დეტალური ინფორმაციის გაცნობა შესაძლებელია სააგენტოს ოფიციალურ ფეისბუქ გვერდზე.