საზოგადოება
26.07.2024 13:02
გორელი ახალგაზრდები ბაკურიანის საზაფხულო ბანაკში გაემგზავრნენ
გორის მუნიციპალიტეტში მცხოვრები ახალგაზრდები ბაკურიანის საზაფხულო ბანაკში გაემგზავრნენ.
ადგილობრივი თვითმმართველობის ინფორმაციით, ბაკურიანში კონკურსის წესით შერჩეული 150-მდე ახალგაზრდა სამ ეტაპად გაემგზავრება. ისინი ბანაკში 5 დღე დარჩებიან.
ბანაკის მონაწილეებს ჩაუტარდებათ ტრენინგები ეფექტური კომუნიკაციის, პროფესიული ორიენტაციის, კარიერის დაგეგმვის, ადგილობრივი თვითმმართველობის, პროექტების წერის, ციფრული უსაფრთხოებისა და სხვა აქტუალური მიმართულებებით.
პროექტის ფარგლებში, ასევე, დაგეგმილია სხვადასხვა შემეცნებითი, კულტურული, სპორტული და გასართობი აქტივობები.
„გორის მუნიციპალიტეტის მერის ვლადიმერ ხინჩეგაშვილის ინიციატივით, ბაკურიანის საზაფხულო ბანაკი გორელ ახალგაზრდებს მესამე წელია მასპინძლობს. პროექტი ადგილობრივი ბიუჯეტიდან ფინანსდება და თვითმმართველობის პროცესებში ახალგაზრდების ჩართულობის ზრდის ხელშეწყობას ისახავს მიზნად“, - აცხადებენ გორის მერიაში.
