სსიპ გიორგი აბრამიშვილის სახელობის საქართველოს თავდაცვის სამინისტროს სამხედრო ჰოსპიტალში უახლესი თაობის აპარატურით, თანამედროვე მიდგომით, დიდი ზომის სიმსივნური წარმონაქმნის თორაკოსკოპიული წესით ჩატარებული ქირურგიული მკურნალობა 22 წლის პაციენტის სრული გამოჯანმრთელებით დასრულდა, - ამის შესახებ ინფორმაციას სამხედრო ჰოსპიტალი ფეისბუქის ოფიციალურ გვერდზე ავრცელებს.

როგორც ინფორმაციაშია აღნიშნული კისტის პრევენციული ამოკვეთა უახლესი თაობის, მაღალი სიზუსტითა და ვიზუალიზაციით გამორჩეული ენდოსკოპიური სადგურის - Olympus 4K-ის საშუალებით, თანამედროვე მცირეინვაზიური მიდგომით, ჰოსპიტალში პირველად, თორაკოსკოპიული წესით შესრულდა.

„გულმკერდში, ტრახეასთან და გულის მაგისტრალურ სისხლძარღვებთან ახლოს მდებარე 10 სმ. ზომის წარმონაქმნი წვევამდელს მუდმივმოქმედ სამედიცინო-საექსპერტო კომისიაზე გეგმური სამედიცინო შემოწმების დროს დაუდგინდა. დამატებითი მაღალტექნოლოგიური კვლევებით დადასტურდა ბრონქოგენული კისტა - იშვიათი თანდაყოლილი დაავადება, რომელიც ხშირად რთულდება ინფექციებით, რა დროსაც რთული სამართავი ხდება.

მინიმალური ტრავმატიზაციით ჩატარებული ოპერაცია პაციენტის სრული გამოჯანმრთელებით დასრულდა.

ოპერაცია ჩაატარეს: სამხედრო ჰოსპიტლის ქირურგიული სამსახურის უფროსის მოვალეობის შემსრულებელმა ქირურგმა გია ჯავახიშვილმა და ქირურგმა (ზოგადი და ენდოსკოპიური ქირურგი) ბაკურ არაბულმა“, - აღნიშნულია ინფორმაციაში.