გორში, დავით გურამიშვილის ქუჩაზე ბულვარის მშენებლობა აქტიურ რეჟიმში მიმდინარეობს.

დასასვენებელი სივრცის მოწყობის მიზნით, შესაბამისი სამუშაოები ძველი ხიდიდან „ახალბაღამდე“ ხორციელდება. საპროექტო მონაკვეთის სიგრძე 157 მეტრია და მდინარე მტკვარს მიუყვება.

როგორც ადგილობრივ თვითმმართველობაში აცხადებენ, პროექტი ადგილობრივი ბიუჯეტიდან ფინანსდება და ითვალისწინებს გარეგანათების, სანიაღვრე ქსელის, ტროტუარების, ველობილიკების, გამწვანების ზოლის, სარწყავი სისტემის, ბეტონის დეკორატიული ფერადი ფილების მოწყობას, ასევე, სკამების და ურნების მონტაჟს.

შეგახსენებთ, ბულვარის მშენებლობის დაწყებამდე, „ახალბაღიდან“ ძველ ხიდამდე, მტკვრის მარცხენა სანაპიროზე რკინა-ბეტონის საყრდენი კედელი აშენდა. ნაპირსამაგრი კედლის (214 მეტრი) გასწვრივ მოეწყო მოაჯირებიც.