გორის მუნიციპალიტეტი 14-დან 18 წლამდე ასაკის მოზარდებს ინოვაციურ პროექტს „ციფრული აკადემია“ სთავაზობს.

ადგილობრივი თვითმმართველობის ცნობით, პროექტის ფარგლებში გორელი ახალგაზრდები ხუთი თვის განმავლობაში ინფორმაციულ ტექნოლოგიებს შეისწავლიან. პროექტში ჩართვის მსურველები ორ სასწავლო მიმართულებას - ფრონტ ენდ დეველოპმენტს და გრაფიკულ დიზაინს გაივლიან. თითოეული ჯგუფი კონკურსის შედეგად შერჩეული 20 მოზარდით დაკომპლექტდება.

„პროექტს ორგანიზაცია „ფიბოლერნი“ გორის მუნიციპალიტეტის მერიის თანადაფინანსებით ახორციელებს. ინიციატივის მიზანია ახალგაზრდებში ინფორმაციული ტექნოლოგიების დაუფლების შესაძლებლობის თანაბარი ხელმისაწვდომობა“, - აღნიშნულია გორის მუნიციპალიტეტის მერიის მიერ გავრცელებულ ინფორმაციაში.

ცნობისთვის, მსურველებს რეგისტრაცია ელექტრონულად: www . laragori . ge შეუძლიათ. განაცხადის შევსება ხუთ აპრილამდე გრძელდება.