პრემიერ-მინისტრის გადადგომის გამო, საქართველოს კონსტიტუციის თანახმად,  მთავრობა ახალი პრემიერ-მინისტრის დანიშვნამდე მოვალეობის შესრულებას განაგრძობს, შესაბამისად, დღეიდან, მას შემდეგ, რაც ირაკლი ღარიბაშვილმა პრემიერის პოსტი დატოვა, ყველა მინისტრი მოვალეობის შემსრულებლის სტატუსით აგრძელებს მუშაობას.

პარლამენტს ორი კვირის ვადა აქვს იმისთვის, რომ პრემიერ-მინისტრობის ახალ კანდიდატს და მის მიერ წარდგენილ სამთავრობო გუნდს და პროგრამას ნდობა გამოუცხადოს.

კონსტიტუციის თანახმად, პრემიერ-მინისტრობის კანდიდატურის წარდგენის უფლებამოსილება არჩევნებში საუკეთესო შედეგის მქონე პარტიას გააჩნია, ამ შემთხვევაში - ,,ქართულ ოცნებას“.

მას შემდეგ, რაც ბიძინა ივანიშვილი პარტია „ქართული ოცნების“ საპატიო თავმჯდომარე გახდა, პარტიის წესდებაში ცვლილება განხორციელდა, რომლის საფუძველზეც, პარტიის პოლიტიკური საბჭო პრემიერ-მინისტრის კანდიდატურას პარტიის საპატიო თავმჯდომარის წარდგინებით ამტკიცებს.

ახალი პრემიერის ნდობის მისაღებად საჭიროა პარლამენტის სრული შემადგენლობის უმრავლესობის - 76 დეპუტატის მხარდაჭერა.

შეგახსენებთ, ირაკლი ღარიბაშვილმა პრემიერ-მინისტრის პოსტის დატოვების შესახებ მთავრობის ადმინისტრაციაში 29 იანვარს გამართულ ბრიფინგზე განაცხადა.